Үндэсний их баяр наадмыг зохион байгуулах хороо өнөөдөр хуралдлаа. Хуралдаанаар есөн салбар хорооны гишүүдийг шинэчлэн батлах, засвар, тохижилтын ажлыг эхлүүлэхтэй холбоотойгоор зохион байгуулалт болон төсвийн талаар хэлэлцлээ.

                Мөн Урлаг соёлын салбар хороо наадмын нээлт, хаалтын үйл ажиллагаа болон Төрийн хүндэтгэлийн концертыг зохион байгуулах найруулагчаар Б.Анар, зөвлөхөөр Монгол Улсын Ардын багш С.Дуламыг ажиллуулахаар санал оруулж, Үндэсний их баяр наадмыг зохион байгуулах хорооны гишүүд хэлэлцэн, баталлаа. 

   Үндэсний их баяр наадмын найруулагчаар өнгөрсөн гурван жил Н.Наранбаатар найруулагч ажилласан билээ. Тэгвэл энэ жил залуу найруулагч Б.Анар ажиллахаар болжээ. Сонгон шалгаруулалтад хоёр найруулагчийн төсөл, таван зохиол ирсэн аж.

  Б.Анар нь “Скин энтертайнмент”-ын найруулагч билээ. Тус энтертайнментын хувьд “Харанга”, “Ice top” хамтлаг болон дуучдын ойн тоглолт, клип хийхээс гадна реклам, соёл урлагийн олон арга хэмжээ зохион байгуулдаг байна.