Залуу дуучин Г.Даваадалай энэ сарын 24-нд UB паласын концертын танхимд "Даваадалай 2023" тоглолтоо хийхээр товложээ. Тэрбээр өнгөрсөн жил "Өөдрөг байгаарай" анхны бие даасан тоглолтоо хийсэн юм. "Мартагдашгүй хайр", "Намирын гол", "Өөдрөг байгаарай", "Бөртөжин", "Дэмтэй амьдрал", "Янзган нүдтэй бүсгүй" зэрэг хуучны болон шинэ олон сайхан дууг дуулсан юм.

       Тэрбээр манай сайтад өгсөн ярилцлагадаа  “Нийтийн дууны салбар бол бидний хүүхэд байхын сонсож ирсэн, хэдийн танил болсон зүйл. Яагаад энэ салбарт орох болсон гэхээр байна вэ гэхээр нас харгалзахгүйгээр олон хүнд өөрийн дуулсан дуугаараа уярал, ухаарал, хайр гээд уран бүтээлээрээ дамжуулж болох зүйлийг өгөхийн хүссэн. Тэр ч утгаараа өөрийн гэсэн өнгө, аясыг уран бүтээлүүддээ шингээж, баригдмал байхаас татгалзахыг хичээдэг.

Залуу хүний хувьд уран бүтээлээ хийж, сонсогчдодоо бэлэн болгохын тулд нөр их сэтгэл, хүч хөдөлмөр гарган ажилладаг.

Ихэнх хүн гэнэтхэн гарч ирсэн залуу дуучин гэж хардаг. Гэтэл бага байхын дуулах дуртай, урлагийн тэмцээн уралдаанд алгасахгүй ордог хүүхэд байсан. Уран бүтээлээ хийгээд удаагүй ч өмнө нь дуулж байсан туршлагатай. Нөгөө талаар залуу хүн байж нийтийн дуунд яагаад орсон юм бол гэдэг. Миний хувьд нийтийн дууны ерөнхий төрөл жанр, урсгалыг алдагдуулахгүйгээр, залуу уран бүтээлчийн хувьд дуу, клипээ өөрөөр хийхийг зорьдог. Нийтийн дуу гэхээр уул, талд дээл өмсөөд дуулдаг биш. Арай өөр өнгө төрхийг гаргахыг зорьдог” гэсэн юм.