“Өвөл”, “Эхиймаа”, “Соёлын довтолгоо”, “Маш нууц”, “Үлгэрийн баатар гэртээ харих замд”, “Хожлын нүүдэл”, “Такси”, “Хүүгүй ломбард” зэрэг кинонд эерэг болон эсрэг дүрийг гаргаж, хошин урлагийн тайзан дээр ааштай, галзуу боловч зөөлөн ээж, эгчийн дүрийг чадварлаг бүтээдэг нэгэн бол тэр. Нөгөө талаар чимээгүйхэн уран бүтээлдээ ороод, урдах ажлаа хийгээд л явдаг даруу боловч авьяаслаг уран бүтээлч.

           Дэлгэцэд харин атаман эмэгтэйн дүрээр сонирхолтой, содон өнгө төрхийг гаргасан. Үүнийг бид “Эхиймаа” киноноос харж болох юм. Ер Чукагаас юу ч гарч мэдэх нөөцтэй уран бүтээлч. Галтай, галзуу, доргио, цоглог дүрийг ч тайзнаа үзүүлж, “Маск” продакшны тоглолтыг түүний тас, тас инээд, хөгжилтэй номергүйгээр төсөөлөшгүй. Түүний тайзнаа үзүүлсэн номероос хамгийн содон нь нэг тийм цоглог, галзуу ээжийн дүр.

          Хүүдээ эхнэр авч өгөхөөр найзындаа ордог номерт “Миний охин одоо үүрнээсээ нисэх болсон. Үүрнээсээ дүүлэн, дүүлэн нисээрэй...” гэдэг хэсгийг санаж байгаа байх. Нэг тийм темптэй дүрээрээ үзэгчдэд хүрсэн. Амьдрал дээрээ ч харин сайн ээж, гурван хүүтэй дархан бэр. Сайн ч эгч гэдэг.  Honеуmoon хамтлагийн дуучин Г.Солонгийн төрсөн эгч гэгддэг бөгөөд хамтдаа “Маск” продакшнд ажилладаг бөгөөд ихэд адилхан. Ийн хошин урлагийн чамбай, чадварлаг цөөн эмэгтэйчүүдийн нэг тэр юм. Сүүлийн үед “Бурхны авралаар чи ирлээ” шоун нэвтрүүлгийн үндсэн жүжигчнээр ажиллаж, мөн л олон сонирхолтой дүрийг үзэгчдэд хүргэж байгаа. Мөн дэлгэцийн уран бүтээлчд ч хүч сориод завгүй байгаа.