“Маск” продакшны жүжигчин А.Гэрэлцэцэгийн төрсөн өдөр тохиож байна. Тэрбээр сүүлийн жилд ээжийн үүргээ биелүүлээд хэсэг уран бүтээлээсээ завсарласан байсан бол Х-ТҮЦ продакшны ээлжит бүтээл “Зохиолгүй амьдрал” жүжигт оролцсоноор эргэн тайзнаа гарсан юм.

           Дуулна, бүжиглэнэ, уран уншина гээд жүжигчин мэргэжлээсээ гадна урлагийн олон талын авьяас бүрдсэн урлагийн цогтой, золбоолог, үзэсгэлэнтэй бүсгүйчүүдийн нэг бол тэр. Энэ ч төрх байдлаараа тайзнаа гарч, үзэгчдийг өөрийнхөөрөө дагуулж, “Гэрэлцэцэг ёстой авьяастай, гэрэлтсэн нүдтэй бүсгүй шүү” гэх яриаг ч гаргана. Гал шиг дүрэлзсэн олон ч үзүүлбэр бий. Түүнээс хамгийн тод нь

“Хаанаас ч харсан хархан нүдтэй

 Хэнээс ч асуусан хөөрхөн Ромео

Эрхэлж байгаа нь, инээж байгаа нь үнэхээр сайхан...” гээд Ромео, Жульеттагийн дүрээр хошин урлагийн тайзнаа гарч, энэтхэг аян дээр бүжиглэж байсан нь.

        Тэрбээр мөн “Бүсгүйчүүд хайрыг хүснэ”, “247 градус”, "Аз жаргал", "Соёлын довтолгоо" зэрэг дэлгэцийн бүтээлд ч тоглосон. Анхлан “Никитон” хамтлагийн “Нандин шүтээн” дууны клипэнд тоглож үзэгчдийн танил болж байсан тэрбээр өдгөө бол хошин урлагийн урдаа барьдаг цөөн эмэгтэйчүүдийн нэг. Тэрбээр дэлгэцэд цөөн дүрд тоглосон байдгийн учраас хэвлэлд өгсөн ярилцлагадаа “Миний хувьд урлагт хөл тавиад 10 гаруй жил болсон байна. Энэ хугацаанд киноны олон санал орж, ирж байсан. Гэхдээ би дүрийн хувьд нарийн шинжихээс гадна цаг заваа хардаг. Миний үндсэн ажил бол хошин урлаг” гэсэн байдаг. Ингэж л тэр хошин урлагтаа үнэнч байж, эцсээ хүртэл тайзан дээр хүмүүсийг инээлгэх ажилдаа тууштай байхаар шийджээ.