Хошин урлаг дотроо хамгийн отгон продакшн гэгддэг “Эмоци” продакшны уран бүтээлчид ирэх сарын 3-нд “Баян боол” шинэхэн уран бүтээлээ үзэгчдэд хүргэхээр зэхэж байна. Тэдний хувьд байгуулагдаад хэдийнэ 10 жил болж, ийнхүү ойгоо угтан шинэ бүтээлээ дэлгэж байгаа аж.

        Энэ талаар “Эмоци” продакшны захирал Д.Түвшинтөр “Саяхан л “Эмоци” продакшныг байгуулаад байж байсан бол өнөөдөр арван нас хүрсэн байна. Энэ хүрээнд “Баян боол” киног үзэгчдэдээ хүргэх гэж байна. Бид албан ёсны эрхтэйгээр энэхүү киногоо хийж байгаа шүү. Түүнээс хулгайлсан зүйл байхгүй. Энэ нийгэмд кино хулгайлаад хийх ямар ч үндэс байхгүй гэдгийг тодотгон хэлмээр байна. 2019 онд Оросын холбооны улсад хийгдэж байсан. Одоогоор арав гаруй улсад албан ёсны эрхтэйгээр хийсэн байдаг” гэв.

           Харин жүжигчин Г.Нарансолонго “Кино бол хамтын уран бүтээл байдаг. Тиймээс энэхүү уран бүтээлийг бүтээлцэхэд оролцсон бүх хүнд баярласнаа илэрхийлье. Бид эзгүй хээр талд хүрээ босгосон. Их нүсэр ажил болсон. Киноны зураг авалт маань Сэлэнгэ аймгийн Хүдэр суманд  байгалийн маш үзэсгэлэнтэй газар болсон. Хүдэр сумын ард иргэддээ их баярлалаа” гэсэн юм.

“Баян боол” кинонд манай хамт олон бүрэн бүрэлдэхүүнээрээ тоглосноос гадна  МУГЖ, х.Ганхуяг, МУГЖ, Ш.Доржсүрэн, МУСТА, дуучин Б.Батмэнд, жүжигчин Х.Баярмаа нар урилгаар ажилласан байна.