• Өнөөдөр 2025-12-16

"Гэрэл гэгээг хүсье" яруу найргийн уншлага энэ сарын 18-нд болно

2023-01-16,   449

     "Гэрэл гэгээг хүсье" яруу найргийн уншлага энэ сарын 18-нд болно. Тодруулбал, "Морьтой ч болоосой" ажлын багийнхнаас нэгдүгээр сарын 18 буюу ирэх лхагва гаригт "Гэрэл гэгээг хүсье" яруу найргийн уншлагыг зохион байгуулж байгаа аж. Тус яруу найргийн уншлагад яруу найрагч Мө.Батбаяр, Б.Чулуунцэцэг, Г.Нэргүй, А.Лхадулам нар оролцох байна.

      Яруу найрагч Мө.Батбаярын шүлгийг хавсарган хүргэж байна.

Намаржаандаа очихуй 

Өвсөнд зассан үүрэнд гурван өндөг цайрна
Гурван цоохор өндгөө саатуулаад
Эх бололтой шувуу эгц дээр нь жиргэнэ
Даль жирвэлзүүлэн агаарт тогтох тэр шувуу
Тэнгэрээс зүүсэн эсгий үнэг шиг харагдана. 
Үнэгийг тэнгэрт тогтоосон үл үзэгдэх утсыг тасдах гэсэн мэт
Хорон санаат эмгэн саран үүлэнд нуугдаж гэтнэ. 
Нурж дарагдсан хуучин худаг хонхойно
Наана нь чулуун онгоц ус царайчилсан морь шиг тонгойно
Тэр онгоцонд гурван чулуу цайрна 
Түүнийг би ус дүүргэсэн онгоцны ёроолоос 
Амаараа үмхэн шүүрч тоглодог байсан юм. 
Хагссан онгоцны ёроол дахь гурван цагаан чулуу
Хар багадаа энд орхиод явсан миний бага нас байна. 
Өвөөгийн гэрийн буурь эдгээд өвс ногоо ургажээ
Өвөг эмгээ үгүйлдэг сэтгэл ингэж эдгэсэн бил үү?
Эзгүй буурь, уяаны шон дээр өвөөлж суугаад донгодно
Эл хуль хашааг тойрон алхахуй дээврийнх нь хулс цуурдана.
Энэ хулснаас сум хийж, өвөөлжинд гэтэн харвадаг байсан минь
Тэр хулсны хоосон ор, намайг хүлээсэн эх нутгийн минь зай юу?
Газрын чийг шимж шаваг навчилжээ
Гараараа ялаа сэвж намаржаандаа алхахуй амгалан
Толгод бөгтөрч шаргал зам улбаатна
Түүгээр алхвал гэх еэнүүр бодол төрнө
Толгод бөгтөрсөн улбаа тэр зам бол 
Тун чиг холдоо дурсахдах дотор сэтгэлийн үзэмж байна.
Тугал наашлуулж намаржаандаа ганцаар алхахуй
Ганц шаргал зөгий өмнүүр хэрж дүнгэнэнэ
Энэ зөгий бол нутгаа санах бүрийд дотроос хатгаж
Энэлэнт сэтгэл төрүүлдэг тэр л зовиур мөн байна. 

"Гэрэл гэгээг хүсье" яруу найргийн уншлага энэ сарын 18-нд болно
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2025 © Зохиогчийн эрх хуулиар хамгаалагдсан. Мэдээлэл хуулбарлах хориотой.