“Монголын жүдо академи”-ийн шинэ жилийн баярын цэнгүүн дуу хуур, бүжиг наадам, хөгжил цэнгэлтэй сайхан зохион байгуулагдлаа. УИД-н долоон давхарт байрлах “New York Empire” ресторанд “Жүдо Академи”-ийн хамт олон улиран одож буй хуучин оноо үдэж, айлчлан ирж буй шинэ оноо угтан авсан юм.

        Амжилт ялалт, ахиц дэвшлээр дүүрэн байсан 2023 оны шилдэг тамирчдаа тодруулж өргөмжлөл шагнал гардуулсан нь баярын арга хэмжээний оргил мөч байв. Энэ жилийн хувьд насанд хүрэгчид, залуучууд, өсвөр үеийн ангилалд Монгол Улсын аваргаар тодорсон О.Хүслэн, Н.Жангарай, Ц.Гэгээн, А.Чөлүжин нар “Оны шилдэг тамирчин”-аар шалгарсан юм.

      ОУХМ О.Хүслэн насанд хүрэгчдийн УАШТ-ий анхны алтан медалиа хүртэж, “Доха 2023” дэлхийн аваргад эх орноо төлөөлөн оролцсон нь энэ жилийн онцлох үйл явдлуудын нэг байлаа. Залуу тамирчид энэ жил хилийн дээс алхаж олон улсын тэмцээнд уралдаануудад бахархам амжилтуудыг гаргажээ.

      Баярын арга хэмжээнд салбар салбарын урлагийн тоглолт, багш нарын нэрэмжит азтаны сугалаа явагдаж, хүүхдүүд өвлийн өвгөн ааваасаа бэлгээ гардаж аван баяр хөөртэйгөөр шинэ жилээ тэмдэглэсэн байна. Ирж буй 2024 ондоо бүх суралцагчид спортын амжилтаа ахиулж, хичээл сурлагадаа сайжирч, зорьж тэмүүлж байгаа мөрөөдөлдөө хүрэхийн төлөө тэмүүлэх болно.