Энэ өдөр Монгол Улсын гавьяат тамирчин, самбо бөхийн дэлхийн хошой аварга, Булган Аймгийн Орхон сумын харьяат, Хүрэлдоржийн Батхишиг мэндэлжээ. Тэрбээр Орхон аймгаас бөхийн гараагаа эхэлсэн. Түүний анхны багш нь Дэлгэрбаяр, Батсуурь, Тэрбиш нар юм. Гавьяат Х.Батхишиг  Монголын самбо бөхийн холбооны Шүүгч нарын зөвлөлийн дарга, Самбо бөхийн Олон улсын шүүгч, цагдаагийн дэд хурандаа, Монгол Улсын гавьяат тамирчин цолтой.

      Хүрэлдоржийн Батхишиг 2001онд самбо бөхийн дэлхийн аварга болсон. 2002 онд самбо бөхийн дэлхийн хошой аварга болж байлаа. Мөн самбо бөхийн Ази тивийн хошой аварга, дэлхийн цомын аваргын мөнгө, хүрэл медальтай, жүдо бөхийн Ази тивийн аваргын хүрэл медальтай, жүдо бөхийн багийн дэлхийн аваргын хүрэл медальтай.

      Самбо бөхийн УАШТ-д 1998, 1999, 2000, 2001 онуудад түрүүлж байв. Харин 2002 онд УАШТ-ээс хүрэл, 2005 онд мөнгөн медаль хүртэж байсан. Жүдо бөхийн УАШТ-д 1998, 2002 онд түрүүлэн, улсын аваргын алтан медаль хүртэж, 1997, 2000, 2001 онд жүдо бөхийн УАШТ-ээс хүрэл 1999 онд мөнгөн медаль хүртэж байсан манай улсын шилдэг тамирчдын нэг юм.