ОХУ-ын Ханты-Мансийск хотноо Монгол, Оросын шатарчдын нөхөрсөг халз тоглолт эхэллээ. Манай баг тамирчид нээлтийн үйл ажиллагаанд ёслол төгөлдөр оролцож, зохион байгуулагч нарт гарын бэлгээ гардуулсан байна. Энэ удаагийн тэмцээнээр зөвхөн өрсөлдөх биш хотоор зугаалж цэнгэг агаарт тархиа цэнэглэн сэргэлтийн бэлтгэл хийж байгаа юм байна.

           Уг нөхөрсөг багийн халз тоглолтыг ФИДЕ, ОХУ-ын шатрын холбоо болон Ханты-Мансийск хотын спортын хорооноос зохион байгуулж буй бөгөөд манай тамирчид тус хотын 12 тамирчинтай рапид төрлөөр халз тоглох юм. МШХ-ны гадаад харилцаа идэвхитэй өргөжиж буйгийн нэг жишээ нь энэхүү тэмцээний 90 гаруй сая төгрөгийн хэлэлцээрийг тамирчдынхаа төлөө өөрийн талд амжилттай хийж, бүх тамирчдын нислэгийн зардал болоод байр хоолны асуудлыг шийдүүлэх гэрээг зохион байгуулагч талтай зөвлөлдөж гүйцэтгэсэн байна.

        Түүнчлэн, манай тамирчид халз тоглолтод багаараа хожвол хүн тус бүр 80 мянган рубль (3 сая орчим ₮) ялагдсан тохиолдолд хүн тус бүр 50 мянган рубль -ийн (2 сая орчим ₮) шагнал авахаар хамтран ажиллах гэрээг амжилттай хийжээ. Монголоос дараах тамирчид олон улсын чансааны дарааллаар шалгаран оролцсон болно. МШХ-ны УЗ-ийн гишүүн Т.Батзориг багийн ахлагчаар холбоог төлөөлөн ажиллаж байна.

Эрэгтэй шатарчид:

GM С.Билгүүн

IM Н.Баттулга

IM Ү.Агьбилэг

IM С.Ган-Эрдэнэ

Эмэгтэй шатарчид:

IM Б.Мөнгөнтуул

WGM Т.Мөнхзул

WIM Б.Баярмаа

FM Э.Хулан

19 нас хүртэлх залуучууд:

FM С.Чингүүн

CM Н.Батболд

WCM Б.Мөнгөнзул

WIM Д.Мөнхзул

Олон улсын рапид чансаагаар эхний дөрөвт багтаж байсан зарим шатарчид өөрийн хүсэлтээр татгалзсан бол зарим 19 хүртэлх насны шатарчид гадаадад тэмцээн давхцаж таарсан тул дараагийн тамирчдыг нөхөж оруулсан.

Манай баг Ханты-Мансийск -ын “ЮГРА” багтай халз тоглолтоо эхлүүлэхийн зэрэгцээ бусад хүндэтгэлийн арга хэмжээнүүдэд оролцох юм. Тус хотын Засаг дарга хатагтай Наталья Комарова манай тамирчдыг хүлээн авч уулзан гарын бэлэг гардуулжээ. МШХ болон 12 тамирчин “Хаан Чесс” брэндийн “Цодгор Хүү” шатрыг дурсгал болгон хадгалуулав.