Монгол Улсын гавьяат тамирчин, чөлөөт бөхийн дэлхийн аваргын хошой мөнгөн медальт, Азийн аварга Оюунбилэгийн Пүрэвбаатар 1973 оны энэ өдөр мэндэлжээ. Тэрбээр тамирчин, дасгалжуулагчид ганзагын наймаанд шилжиж, бэлтгэлийн заал эзэнгүйдэн тамирчингүй шахам болсон үеийн тамирчин. Тэр хүнд цаг үед улсын шигшээ баг тарж, бутран клубийн системд орсон юм. Зах зээлийн шилжилтийн хүнд үеийг  спортдоо, чөлөөт бөхдөө үнэнч хэвээр үлдэж, сэтгэлээ зориулсан тулдаа О.Пүрэвбаатар даван туулан гарсан байдаг.

           Тамирчин хүний тэсвэр, хатуужлын туйлыг харуулсан түүний хөдөлмөр, хөлсний үнэ цэн 1994 оны ДАШТ-ий наймдугаар байр, 1997 оны Азийн аваргын алтан медаль, 1997 оны Зүүн Азийн наадмын алтан медаль, 1998 оны ДАШТ есдүгээр байр, 1998 оны Бангкокын Азийн наадмын мөнгөн медаль, 1999 оны ДАШТ-ий арваннэгдүгээр байр, “Сидней-2000” олимпын тавдугаар байр, “Софи-2001” ДАШТ-ий мөнгөн медаль, 2002 оны дэлхийн цомын хүрэл медаль, “Тегеран 2002” ДАШТ-ий мөнгөн медалийн амжилтаар үнэлэгдсэн юм.