Олон улсын оюутны спортын холбооны “FISU” Швейцарийн Женев хотноо болж өнгөрсөн Ерөнхий ассамблейн XXXVIII чуулганаар тус холбооны удирдлагыг сонгож баталгаажуулсан байна. Тус холбооны ерөнхийлөгчөөр Швейцарь Улсын иргэн Леонц Эдер Leonz Eder шинээр сонгогдлоо. Леонц Эдер нь 2021-2023 онд ОУОСХ-ны Ерөнхийлөгчийн үүрэг гүйцэтгэгчээр ажиллаж байсан юм.

        Учир нь 2019 оны 11 сарын 15-16-нд Италийн Турин хотноо болсон XXXVII чуулганаар ОХУ-ын иргэн Олег Матыцин ерөнхийлөгчөөр сонгогдсон ба ОХУ дахь допингийн асуудал, Орос Украины хямралаас улбаатай хоригтой холбоотойгоор О. Матыцины үйл ажиллагааг түдгэлзүүлсэн байсан юм. Иймээс тэргүүн дэд ерөнхийлөгчөөр ажиллаж байсан Леонц Эдер нь өнөөдрийг хүртэл ерөнхийлөгчийн үүрэг гүйцэтгэгчээр ОУОСХ-ны онлайн чуулганаар 2021 онд сонгогдон ажиллаж байсан билээ.

         Ийнхүү түүнтэй өрсөлдөх хүн гараагүй учраас ганцаараа Леонц Эдер дэвшин, сонгогдсон юм. Тэрээр Монгол Улсад хэдэн удаа ирж байсан. Л. Эдер нь Сант Галлианы их сургуульд олон жил биеийн тамирын чиглэлээр ажиллаж байсан ба ОУОСХ-нд 2007 оноос ГХ-ны гишүүний болон бусад удирдах сонгуульт албан тушаалд ажиллаж ирсэн туршлагатай хүн билээ.

         Чуулганаар ОУОСХ-ны тэргүүн дэд ерөнхийлөгч, дэд ерөнхийлөгч дөрвөн хүн, Ерөнхий санхүүч, гишүүдийн ахлагч, ГХ-ны 15 гишүүдийг сонгон баталсан юм. Ийнхүү ОУОСХ-ны 23-н Гүйцэтгэх хорооны гишүүд шинэчилэгдэн батлагдлаа. ОУОСХ-ны Ерөнхий санхүүчээр Монгол Улсын иргэн, МОСХ-ны ерөнхийлөгч Д. Баясгалан нь олонхийн саналаар нэр дэвшин сонгогдлоо.

          Тэрбээр ОУОСХ-ны гишүүнээр 2003 онд, Ерөнхий санхүүчээр 2007 оноос хойш тасралтгүй тав дахь удаагаа ийнхүү сонгогдон, 2027 оныг дуустал ажиллахаар боллоо. Энэ удаагийн Ерөнхий Ассамблейн XXXVIII Чуулганаар Д. Баясгалан нь ОУОСХ-ны 2019-2023 оны санхүүгийн тайлан илтгэлийг тавьж, 2024-2025 оны төсвийн төслийг Чуулганы төлөөлөгчөөр хэлэлцүүлэн батлуулан ажилласан юм.