Хүндийн өргөлтийн 2023 оны залуучуудын дэлхийн аварга шалгаруулах тэмцээн, Мексик Улсын Гвадлахара хотод зохион байгуулагдаж байна.Тус ДАШТ-ээс О.Төгс-Эрдэнэ хүрэл медаль хүртлээ. Хүндийн өргөлтийн залуучуудын дэлхийн аварга шалгаруулах тэмцээн дөрөв дэх өдрөө болж байгаа бөгөөд манай улсаас гавьяат дасгалжуулагч Ц.Хосбаярын удирдлага дор эмэгтэйчүүдийн 64 кг-ын жинд Отгончимэгийн Төгс-Эрдэнэ өрсөлдсөн юм.

       Түүний жинд 32 тамирчин оролцсон, О.Төгс-Эрдэнэ огцом өргөлтөөр 95 кг, түлхэлттэй өргөлтөөр 113 кг-ыг өргөж хүрэл медаль хүртэж, залуучуудын ДАШТ-ээс Монголын тамирчдын долоо дахь медалийг эх орондоо авчирлаа.

        Түүх сөхвөл, 1978 оны Болгарын Софи хотод болсон залуучуудын ДАШТ-ий эрэгтэйчүүдийн ангилалд Д.Энхбаатар хүрэл медаль хүртэж байв. Харин эмэгтэйчүүдээс гавьяат тамирчин М.Анхцэцэг нэг алт, хоёр мөнгө, О.Дархижав хоёр хүрэл медаль хүртэж байлаа.

        Д.Энхбаатар Монголын хүндийн өргөлтийн тамирчдын дундаас залуучуудын ДАШТ-ий анхны медалийг хүртсэн түүхтэй. Түүнээс хойш манай улсаас эрэгтэй тамирчин залуучуудын ДАШТ-ээс медаль аваагүй байна. Залуучуудын ДАШТ-ий отгон медальт О.Төгс-Эрдэнэ нь өнгөрсөн жил өсвөр үеийн Ази тивийн аварга шалгаруулах тэмцээнээс алтан медаль хүртэж байсан юм.