Узбекистан Улсын Ташкент хотноо өнөөдөр жүдо бөхийн өсвөр үеийн Ази тивийн аварга шалгаруулах тэмцээн эхэлнэ. Энэ удаагийн өсвөр үеийн Азийн аварга энэ сарын 16-17-ны өдрүүдэд зохион байгуулагдана. Өсвөрийн жүдо бөхийн Ази тивийн аварга шалгаруулах тэмцээнд 15 орны 181 жүдоч өрсөлдөнө.

         Тэмцээний эхний өдөр буюу өнөөдөр охидын 40 кг, 44 кг, 48 кг, 52 кг, хөвгүүдийн -50 кг, 55 кг, 60 кг, 66 кг жингийн барилдаанууд явагдах ба манай улсаас таван бөх зодоглоно. Хөвгүүдийн 55 кг-ын жинд Ч.Төгөлдөр тэргүүлэн барилдах ба эхний тойргийн барилдаанд гоц мөргөсөн ялалт авсан байна. 

        Хөвгүүдийн 60 кг-ын жингийн “D” хэсгийг тэргүүлж буй С.Хатанбаатар  мөн л эхний тойрогт гоц мөргөсөн ялалт авчээ. Хөвгүүдийн 66 кг жингийн “В” хэсэгт Н.Тэмүүжин эхний тойрогт Киргизстаны бөхтэй учраа таарсан байгаа. 

         Охидын 52 кг жинд манай улсаас хоёр бөх барилдах ба “А” хэсгийг 2022 оны өсвөрийн Ази тивийн аваргын хүрэл медальт, Т.Ариунзаяа тэргүүлэх ба эхний тойргийн гоц мөргөн ялалт авсан байна. Харин “С” хэсэгт С.Шүр эхний тойрогт Киргизстаны бөхтэй учраа таарсан байгаа.