Оюутны 3х3 сагсан бөмбөгийн дэлхийн аварга шалгаруулах тэмцээн өнөөдөр  Катар Улсад эхэлж байна. Катарын Доха хотноо энэ сарын 10-12-ны өдрүүдэд оюутны сагсан бөмбөгийн 3х3 төрлийн ДАШТ болно. Тэмцээнд дэлхийн эрэгтэй 12, эмэгтэй 12 шилдэг багийн тамирчид урилгаар оролцож байна.

        Энэхүү 24 багийн тоонд Монгол Улсын “Роял” олон улсын их сургуулийн эмэгтэй баг орсон. Багийн ахлагчаар МОСХ-ны Удирдах зөвлөлийн гишүүн М. Өсөхбаяр, “Роял” ОУИС-ийн дасгалжуулагч С. Тулга нар томилогдон явсан. Тамирчдын бүрэлдэхүүнд А. Хонгорзул, Б. Нямцэцэг, Б. Энхтуул, Э. Нарангоо нар орсон байна.

          Баг тамирчдыг Монголын оюутны спортын холбооноос зохион байгуулан ОУОСХ-ноос явуулж буй энэхүү тэмцээнд оролцуулж, тамирчдын зардлыг хариуцан гаргаж байгаа аж. “Роял” ОУИС-ийн эмэгтэй баг нь 2022 оны Турк Улсад болсон өнгөрсөн оюутны ДАШТ -д амжилттай оролцон хүрэл медаль хүртсэн тул ийнхүү 2023 оны тэмцээнд хүндэтгэлтэйгээр уригдах болсон юм.

          Тэмцээний дүрэм ёсоор 12 багууд дөрвөн хэсэгт гурван багаар хуваагдан тоглох юм. Эмэгтэй “А” хэсэгт Иран, Монтерири, Украин,  “С” хэсэгт Египт, Шинэ Зеланд, Катар,  “Д” хэсэгт Румын, Австрали, Тайваны багууд оржээ. Харин Монголын баг тэмцээний “В” хэсэгт Мексик, Кени Улсын багуудтай сугалаа таарчээ.

       Ингээд манай эмэгтэй баг нь орон нутгийн цагаар 11 сарын 10-ний өдрийн 10:00 цагт Кенийн багтай, 16:50 цагт Мексикийн багуудтай хэсгийн тоглолтоо хийнэ. Тэмцээнийг Олон улсын оюутны спортын холбооны fisu.tv сувгаар шууд үзэх боломжтой.