Олимп, нийтийн биеийн тамир, спортын Үндэсний хороо, Биеийн тамир, спортын улсын хороо хамтран иргэдээс бие бялдрын ерөнхий хөгжил, хөдөлгөөний идэвхийг тодорхойлох судалгааг арваннэгдүгээр сарын 9-24-ний өдрүүдэд улсын хэмжээнд зохион байгуулахаар бэлтгэл ажлаа хангах хүрээнд аймаг, дүүргүүдийн Биеийн тамир, спортын хороо, газрын ахлах мэргэжилтнүүдэд заавар, зөвлөмж танилцуулах сургалтыг өчигдөр зохион байгуулсан байна.

           Сургалтын үеэр аймаг, дүүргүүдийн БТС-ын газар, хороодын ахлах мэргэжилтнүүдэд хандаж, БТСУХ-ны даргын үүргийг түр орлон гүйцэтгэгч О.Баттулга хэлсэн үгэндээ “Биеийн тамир, спортын салбарыг түүчээлэгч та бүхэн иргэдийнхээ бие бялдрын хөгжил, идэвхитэй амьдарлыг төлөвшүүлэх үйл хэрэгт манлайлан оролцох хэрэгтэй” гэв. Мөн аймаг, дүүргүүдийн Биеийн тамир, спортын газар, хороодын арга зүйч болон албан хаагчдыг Япон Улсын Шизүока мужийн Яйзү хотод ирэх оны тавдугаар сард болох богино хугацааны сургалтад хамруулах болсоноо дуулгалаа.

       Иргэдийн бие бялдрын хөгжил, хөдөлгөөний идэвхийг тодорхойлсны үндсэн дээр иргэдэд тохирсон дасгалын жишиг загварыг спортын шинжлэх ухааны орчин үеийн онол болон түүвэр судалгаанд суурилан боловсруулах нь энэхүү судалгааны зорилго оршиж байгаа юм.

         Судалгааны хүрээнд 21 аймаг, есөн дүүргийн 18-64 насны иргэдээс энэхүү судалгааг авах ба үүнд 7000 хүнийг хамруулахдаа асуулга, бие махбодын хэмжилт, бие бялдрын сорил гэсэн гурван хэсгээс бүрдэж байна. Иргэдээс мэдээллийг цуглуулахад ердөө 35-45 минутын хугацаа зарцуулагдана.

          Улмаар иргэдээс авах түүвэр судалгааны хүрээнд иргэдийн нас, хүйс, бие бялдрын хөгжил, ажил мэргэжлийн онцлог, амьдралын хэв маяг, хоол шим тэжээлийн бүтэц, эрүүл мэндийн байдал, хөдөлгөөний хэв шинж, биеийн тамир, спортоор хичээллэдэг давтамж зэрэг хүчин зүйлсийг тодорхойлсноор суурь судалгааны нэгдсэн сантай болох боломж бүрдэж байна.