Сантехник угсралтын “Нью Харвест” ХХК-ийн нэрэмжит чөлөөт бөхийн өсвөр үеийн хөвгүүдийн олон улсын тэмцээнийг МЧБХ болон нийслэлийн ерөнхий боловсролын 73 дугаар сургуулийн захиргаа хамтран зохион байгуулж байна.

      Тэмцээн энэ сарын 7-8-ны өдрүүдэд 73-р сургуулийн спорт зааланд 12 жингийн ангиллаар зохион байгуулагдана. Тус тэмцээнд 19 байгууллагын 200 гаруй тамирчин өрсөлдөж байна. ОХУ-ын Буриадын Кижинг дүүргийн 10 тамирчин, Өвөр Монголын 14 тамирчин иржээ.

        Өнөөдөр 38 кг, 45 кг, 51 кг, 60 кг, 71 кг, 110 кг-ын жингийн урьчилсан шатны барилдаанууд явагдаж нээлтийн үйл ажиллагаа боллоо. Тус үйл ажиллагаанд 19 байгууллагын тамирчид, дасгалжуулагчид, тэмцээний зохион байгуулагчид болон дэмжигчид өргөнөөр оролцлоо.

        Тэмцээнийг зохион байгуулагч НЕБ-ын “73 дугаар сургууль”-ийн захирал Ш.Арслан, болон “Нью Харвест ХХК”-ы захирал Ч.Шинэбаяр нар тэмцээнийг нээж мэндчилгээ дэвшүүлсэн. Улмаар захирал Ч.Шинэбаяр болон 73-р сургуулийн чөлөөт бөхийн дасгалжуулагч Б.Баасандорж нар “Спортын Мастер” цол тэмдгээр, МЧБХ-ны “Ялалт” одонгоор Ш.Арслан, Ч.Шинэбаяр, Э.Дамдинсүрэн, Б.Золжаргал нар тус тус шагнагдлаа.

        Энэ үеэр мөн нэгэн чухал эрхэм болох 73 дугаар сургуулийн чөлөөт бөхийн ахлах дасгалжуулагч Ж.Дандарт Монголын чөлөөт бөхийн дасгалжуулагчид болон түүний шавь нарын зүгээс хүндэтгэл үзүүлэв.