Монгол Улсын гавьяат тамирчин, чөлөөт бөхийн дэлхийн аварга шалгаруулах тэмцээний мөнгөн медальт Банзрагчийн Оюунсүрэн 1989 оны  энэ өдөр мэндэлжээ.

      “Женко” клубийн дасгалжуулагч, МУГТ  Б.Оюунсүрэн Завхан аймгийн Дөрвөлжин суманд төржээ. 2008 онд Улаанбаатар хотын 77-р дунд сургуулийг төгсөөд МУБИС-ийн Биеийн тамирийн дээд сургуульд элсэн суралцсан байна. 2006 оноос "Замчин" спорт клубт  МУГТ, МУГД Т. Сүхбаатарын удирдлага дор чөлөөт бөхөөр хожуу хичээллэж эхэлсэн юм билээ. Харин 2008 оноос "Хангарьд" клубийн тамирчин болжээ. 2008 онд залуучуудын УШБ, 2010 онд насанд хүрэгчдийн улсын шигшээ багийн тамирчин болжээ.

       Тэрбээр 67 кг-ын  жинд барилддаг байв. 2010 онд Энэтхэгийн Шинэ Дели хотод болсон Азийн аварга шалгаруулах тэмцээнээс мөнгөн медаль хүртсэн. Улмаар 2011 онд Туркийн Станбул хотод ДАШТ-д Украин, Японы шилдэг бөхчүүдийг дараалан ялж,  Хятадын Ши Лүо Жүо Ма-д дийлдэж, дэлхийн аваргаас мөнгөн медаль хүртсэн манай улсын шилдэг тамирчдын нэг юм.