МҮОХ-ны ерөнхийлөгч, ОУОХ-ны Гишүүн Б.Баттүшиг “Ханжоу 2022” Азийн наадмын чөлөөт бөхийн 57кг жингийн аварга, ОУХМ Т.Тулга болон дугуйн засмал замын бөөн гараатай уралдаанаас хүрэл медалийг эх орондоо авчирсан ОУХМ С.Жамбалжамц нарыг “Олимпик хаус”-т хүлээн авч, хүндэтгэл үзүүллээ.

      Уулзалтаар МҮОХ-ны ерөнхийлөгч Б.Баттүшиг тамирчид нь нийгэм даяар үлгэр дуурайлал үзүүлж, эерэг зүйлсийг түгээн дэлгэрүүлэх, олимпын хөдөлгөөний гол цөм хэмээн онцолж, МҮОХ-ноос тамирчдаа уриалан нийгмийн сайн сайхны төлөөх үйл ажиллагааг эрчимтэй өрнүүлэхээр хэлэлцлээ.

      Мөн МҮОХ-ноос тамирчдын тамирчны дараах карьерт ихээхэн анхаарал хандуулан ажиллаж байгаа бөгөөд допингийн хор хөнөөлийн тухай тогтмол мэдээ мэдээлэл хүргэж, тамирчдаа хамгаалах чиглэлээр эрчимтэй ажиллахаа илэрхийлэв.

         Түүнчлэн МҮОХ-ны Тамирчдын комиссын үйл ажиллагаанд идэвхтэй оролцон тамирчдад тулгамдаж буй асуудлуудыг дэвшүүлэхэд дуу хоолойгоо нэгтгэхийг уриалж, "Парис 2024" олимпын наадамд өндөр амжилт гаргахыг хүсэн ерөөлөө.