Жюү жицү бөхийн “Улаанбаатар-2023” дэлхийн аварга шалгаруулах тэмцээний дөрөв дэх өдөр эмэгтэйчүүдийн -70 кг-ын жинд ОУХМ Батбаатарын Хулан хүрэл медалиар энгэрээ мялаав. Тэрбээр БНСУ-ын Ми Жэ Ман, Казахстаны Даяна Аманжолова нарыг тус тус ялж хагас шигшээд энэ жингийн дэлхийн чансааг тэргүүлэгч, 2021, 2022 оны дэлхийн аварга Германы Дениз Крахтын боох мэхэнд орж ялагдсан. Тэгвэл хүрлийн төлөө ДАШТ-ий мөнгө, хүрэл медальтай Йорданы Какиш Яараг 3:0-ээр ялж монголчуудаа баярлуулав.