Жюү жицү бөхийн “Улаанбаатар-2023” дэлхийн аварга шалгаруулах тэмцээний дөрөв дэх өдөр монголын шилдэг тамирчид өрсөлдөж байна. “Не-ваза” төрлийн эмэгтэйчүүдийн +70 кг-ын жинд ОУХМ Мягмарын Сугар хүч үзэх юм. Түүний хувьд 2013 онд АНУ-ын Лос-Анжелест Монголын жюү жицү бөхийн түүхэнд анхны дэлхийн аварга болж байсан. Түүнээс жилийн дараа Холливудэд дахин барилдаж хүрэл медаль хүртэж, дэлхийн хос медальтан болсон.

            Мөн түүний хувьд “Данан-2016” Азийн элсний наадам, “Ашхабат-2017” Азийн танхимын спортын наадмаас хүрэл медаль хүртэж, 2019 онд Улаанбаатарт болсон Азийн аварга шалгаруулах тэмцээнд +70 кг-ын жинд аваргалж төрийн дууллаа эгшиглүүлж байв. М.Сугар нь жюү жицүгээс гадна жүдо, самбо, кураш, бүстэй барилдаан гээд бөхийн олон төрөлд хүч үзэж тив, дэлхийд өндөр амжилт үзүүлсэн тамирчин. Тэрбээр 2016 оноос хойш Дорноговь аймагт, 2019 оноос жюү жицүгийн “Хилэнц” дэвжээний дасгалжуулагчаар ажиллаж шавь нараа бэлтгэж байгаа.