Энэ жилийн наадмын бөхийн тааврыг Г.Ганхуяг, Ц.Бямба-Отгон, С.Сүхбат, М.Бадарч нар төөрөгдөлд оруулан сайхан барилдлаа. Шинээр гурван улсын начин, хоёр харцага, нэг гарьд, нэг арслан цолтон төрөв. Ховд аймгийн Булган сумын харьяат аймгийн арслан, чөлөөт бөхийн Үндэсний шигшээ багийн тамирчин, Ази тивийн аварга шалгаруулах тэмцээний хүрэл медальт, ОУХМ  Г. Ганхуяг энэ жилийн наадмын үндэсний бөхийн гол шуугианы эзэн байлаа. 170 см хүрэхгүй шахам жижиг биетэй тэрбээр улсын том цолтнуудыг ээлж дараалан нураалаа.  Нэгийн даваанд Б.Гончигсүрэнг, хоёрын даваанд улсын начин Н.Мустафаг, гурвын даваанд улсын харцага Н.Батзаяаг давсан. Дөрвийн даваанд улсын аварга П.Бүрэнтөгсийг, тавын даваанд улсын гарьд Ө.Бат-Оршихыг,  зургаагийн даваанд улсын арслан Б.Орхонбаярыг давж, улсын начин цолыг алгасан улсын харцага цолтон боллоо.