Монголын шатрын холбооны дэд ерөнхийлөгч, "Төр Монгол" хөгжлийн төвийг үүсгэн байгуулагч, олон улсын зөвлөх дасгалжуулагч бол Цэрэндэжидийн Батболд билээ. Түүнийг тулгар төрийн 2232, Их Монгол улсын 817, Үндэсний эрх чөлөө тусгаар тогтнолоо сэргээн мандуулсны 112 , Ардын хувьсгалын 102 жилийн ойн босгон дээр Монгол Улсын Ерөнхийлөгчийн зарлигаар "Гавьяат дасгалжуулагч" хэмээх эрхэм хүндтэй цолоор шагнав.

           Ц.Батболд 20 гаруй жил шатрын тогоонд чанагдаж, шатрын спортыг нийтийн дунд хөгжүүлэхэд үнэтэй хувь оруулж, мянга мянган хүүхэд багачуудыг шатрын ертөнц рүү хөтлөн алхаж, тив дэлхийд данстай өсвөрийн шилдэг мастеруудыг бэлтгэн,алсыг чиглүүлэгч алтан гадас од адил ирээдүйн замыг нь гэрэлтүүлж өгсөн түүний нөр их хөдөлмөрийг төр үнэллээ. Ц.Батболд ийнхүү П.Жигжидсүрэн, Ж.Лхагва нарын дараа "Монгол улсын гавьяат дасгалжуулагч" цол хүртсэн гурав дахь эрхэм боллоо.