Үндэсний баяр наадмын шагайн харваа өчигдөр эхэлсэн. Өсвөрийн харваанд 10 багийн 80 гаруй харваач оролцож байгаа бөгөөд 8-17 насны харваач хүүхдүүд өрсөлдөж байна. Тэгвэл ахмадын харваанд 43 багийн 300 гаруй харваач цэц сорьж байгаа юм. Үндэсний их баяр наадмын тухай хуулиар бүх аймаг наадмаа нэг өдөр эхлүүлэхээр болсонтой холбогдуулан зарим баг орон нутагтаа харваж байгаа.

          Тийм учраас өмнөх жилээ бодвол харьцангуй цөөхөн баг өрсөлдөж байгааг Шагайн харвааны салбар хорооноос мэдээлэв. Насанд хүрэгчдийн харвааны эхний хоёр тойргийн тэмцээн өчигдөр өндөрлөсөн бол ахмад болон өсвөрийн харваачдаас шилдэг дөрвөн баг шалгарчээ. Ахмад болон өсвөрийн ангилалд шигшээ дөрөвт шалгарсан багууд долдугаар сарын 12-ны өдөр цэц мэргэнээ сорьж, аваргаа тодруулна.