Монгол Улсын гавьяат тамирчин Б. Сэр-Од 11 дэх удаагаа дэлхийн аварга шалгаруулах тэмцээнд өрсөлдөх гэж байна. Дэлхийн хөнгөн атлетикийн холбооноос ирэх наймдугаар сарын 19-27-ны өдрүүдэд хөнгөн атлетикийн дэлхийн аварга шалгаруулах тэмцээнд өрсөлдөх Монголын дөрвөн марафон гүйлтийн тамирчны нэрийг баталгаажуулан зарлав.

        Үүнд Ц. Бямбажав, Ж. Олонбаяр, Г. Хишигбаяр, Монгол Улсын гавьяат тамирчин Б. Сэр-Од нар дэлхийд өрсөлдөх нь тодорхой боллоо. Тэр дундаа өмнө нь 10 удаа ДАШТ, таван удаа олимпод өрсөлдөж байсан, өдгөө 42 нас хүрч яваа гавьяат тамирчин Б.Сэр-Од ийнхүү 11 дэх ДАШТ-ээ өрсөлдөх ховор тохиолдол, шинэ амжилтын эзэн болж байгаа юм.