МҮОХ-ноос Азийн олимпын зөвлөл, Монголын спортын сэтгүүлчдийн холбоотой хамтран шилдэг залуу сэтгүүлч шалгаруулах “Asian Games Youth Reporter” уралдаант шалгаруулалтыг явуулсан. Энэхүү арга хэмжээнд 16-20 насны 30 залуус хамрагдаж, Хөдөлмөрийн баатар, гавьяат тамирчин М.Уранцэцэгийн талаар эсээ бичих даалгавар аван өрсөлдсөн бөгөөд ялагч нэг хүүхэд "Ханжоу-

           2022" Азийн наадамд урилгаар оролцох эрхээр шагнуулах байв. Азийн олимпын зөвлөлөөс томилогдон ирсэн тусгай баг шалгаруулалтыг эцэслэж, олимпын өдрийн арга хэмжээний үеэр шилдэг оролцогчдын шагналыг гардууллаа. Шалгаруулалтын гуравдугаар байрт “Оюунлаг” сургуулийн сурагч Доржсүрэнгийн Марал, дэд байрт “Шинэ Эрин” сургуулийн сурагч Бямбасайханы Энэрэл нар шалгарч, өргөмжлөл, мөнгөн шагнал, үнэ бүхий зүйлээр шагнуулав.

          Харин тэргүүн байрт Швейцарын Лозанн хотын Бизнесийн сургуулийн оюутан Баасандоржийн Энхсаран тодорч, “Ханжоу-2022” Азийн наадамд урилгаар оролцох эрхийн эзэн боллоо. Шагналыг МҮОХ-ны ерөнхийлөгч Б.Баттүшиг, тэргүүн дэд ерөнхийлөгч Ч.Наранбаатар, ерөнхий нарийн бичгийн дарга Э.Бадар-Ууган, Азийн олимпын зөвлөлийн Хэвлэл мэдээлэл болон телевизийн албаны захирал Жинс Жоу Жиен, Азийн олимпын зөвлөлийн редактор Жереми Уолкер нар гардуулан өгөв.