Монголын чөлөөт бөхийн холбоос ДАШТ-д оролцох эрхийн сонгон шалгаруулах сорилго тэмцээнийг долдугаар сарын 29-30-ны өдрүүдэд хийнэ гэж зарласан. Үүнийг 2023 оны  чөлөөт бөхийн Монгол Улсын аварга шалгаруулах тэмцээнд түрүүлсэн бөхчүүд эсэргүүцэн зургадугаар сарын 8-ны өдөр хэвлэлийн бага хурал зохион байгуулсан билээ. Гэтэл өнөөдөр буюу зургадугаар сарын 22-ны өдөр УАШТ-д түрүүлж чадаагүй бөхчүүдийн төлөөлөл сорилго, сорилт тэмцээнийг хийх нь зөв гэсэн байр сууриа илэрхийлэн хэвлэлийн бага хурал хийв.

        Монголын чөлөөт бөхийн холбооны оновчтой бус шийдвэр нь ийнхүү бөхчүүдийг хоёр талцуулах “Хэрүүлийн алим”-ын өгөөш болж хувирчихлаа. Хоёр тал болон талцан, сорилт тэмцээнийг хийх нь зөв, буруу гэж маргалдаж байгаа тамирчдын аль, аль талыг үгүйсгэж болохгүй. Харин тамирчдыг үл ойлголцол, хэрүүл, маргаан руу түлхсэн Монголын чөлөөт бөхийн холбоо, түүнийг удирдан чиглүүлж буй хүмүүсийн, алдаатай бодлого шийдвэрийн золиос нь чөлөөт бөхийн тамирчид болж хувирч байна.