Дэлхийн тусгай олимпын наадам Герман Улсын Берлин хотод болж байна.  Энэхүү наадам нь дэлхийн том спортын арга хэмжээ юм. Энэ удаагийн наадамд нийт 190 орны 7000 гаран тамирчин спортын 26 төрөлд оролцож байгаа. Монгол Улсын тусгай олимпын баг тамирчид есөн спортын төрөлд 44 тамирчин, 18 багш дасгалжуулагчийн өргөн бүрэлдэхүүнтэй оролцож байна.

       Тусгай олимпод дауны хам шинж, аутизмын эмгэг, саажилт зэрэг оюуны хөгжлийн бэрхшээлтэй хүүхэд залуус оролцдогоороо паралимпаас ялгаатай. Дэлхийн тусгай олимпын наадам 2023 оны зургаадугаар сарын 17-25-ны өдрүүдэд Германы Берлин хотод анх удаагаа зохион байгуулагдаж байгаа билээ. 

        Зургаадугаар сарын 17-ны нээлтийн ажиллагааны оргил хэсэг болох бамбар залах ёслолд МТОХ-ны ширээний теннисний тамирчин Б.Амарболд, түүний дэмжин тоглогч Улаанбаатар хотын ерөнхий боловсролын 47-р сургуулийн сурагч Л.Бат-Оргил нар  тусгай олимпын Зүүн Азийн бүсээс сонгогдон, буухианд оролцсон байна. 

       Монголын дауны холбооны зургаан тамирчин тусгай олимпын Берлиний зуны наадамд бадминтон, усанд сэлэлт, боччи, ширээний теннис, жүдо гэсэн спортын таван төрлөөр оролцож байгаа юм.  Монгол Улс, Хүүхдийн төлөө сангийн хөрөнгийг зарцуулах, түүнд хяналт тавих журамд олон улс, тив, дэлхийн уралдаан тэмцээн, наадамд оролцох, бэлтгэл хангаж байгаа болон оролцох болзол хангасан хөгжлийн бэрхшээлтэй хүүхдүүдэд дэмжлэг үзүүлэхээр тусгасан байна.