Тайланд Улсын Бангкок хотноо зургадугаар сарын 17-27-ны өдрүүдэд  зохиогдож буй 2023 оны “АСЕАН”-ын аварга шалгаруулах тэмцээн албан ёсоор эхэллээ. Тус тэмцээнд Азийн шилдэг орнуудын төлөөллүүд болох БНХАУ, Вьетнам тэргүүтэй нийт 16 улсаас 400 орчим өсвөрийн шатарчин наймаас 20 хүртэлх насны ангилалд өрсөлдөж байна.

            Энэхүү тэмцээнд эхний гурван байрт шалгарсан шатарчид Олон улсын шатрын холбооны мастераас эхлээд их мастерын нэгдүгээр норм авах боломжтой юм. Тэмцээний нээлтийн үеэр манай баг шилдэг шатарчдын дасгалжуулагч, дэлхийн аваргын төлөө гурван удаа шалгарч тоглосон, алдарт их мастер Артур Юсуповтой уулзсан сайхан үйл явдал болжээ.

           Монгол Улсаас Өмнөговь аймаг, Сэлэнгэ аймаг болон "Элит Брэйн" Олон улсын шатрын академийн найман тамирчин энэ жилийн “АСЕАН”-ын аварга шалгаруулах тэмцээнд оролцож байна. Тэмцээний нээлтийн ажиллагааны үеэр Монгол Улсын тугийг Өмнөговь аймгийн “Даян Хаан Билигт” шатрын клубийн тамирчин С.Төгөлдөр болон А.Номин нар мандууллаа.