Киргизстан Улсын Бишкек хотод “U23” насны Азийн аварга шалгаруулах тэмцээн эрэгтэйчүүдийн ангиллаар үргэлжилж байна. Өнгөрсөн жилийн залуучуудын Азийн аваргын мөнгөн медальт, “Төв-Арж” клуб, "Монгол" группийн бөх Наадамбатын Батбилгүүн 23 хүртэлх насны Азийн аварга шалгаруулах тэмцээний эрэгтэйчүүдийн 86 кг-ын жинд дөрөв ялж алтан медалийн эзэн боллоо. Тэрбээр 19 настай залуу тамирчин.

     Н.Батбилгүүн шигшээ барилдаанд БНХАУ-ын Өвөрмонгол бөх Сийлэнхүүг 7:1-ээр илүүрхснээр монголын эрэгтэй бөхчүүдээс "U23" насны ангилалд Азийн аваргад түрүүлсэн дөрөв дэх эрэгтэй тамирчин болж байна. Түүнээс өмнө нь ОУХМ Т.Тулга, Э.Тэмүүлэн, Б.Отгонбаяр нар дөрвөн жилийн өмнө нь Улаанбаатарын дэвжээнд аварга болж байв.