Киргизстан Улсын нийслэл Бишкек хотноо бөхийн чөлөөт барилдааны “U23” насны Ази тивийн аварга шалгаруулах тэмцээн болж байна. Тус тэмцээний эмэгтэйчүүдийн 65 кг-ын жинд “Мон-Алтиус” дээд сургуулийн оюутан, “Алдар” спорт хороо, “Баянгол Аваргууд академи”-ийн тамирчин Түвшинжаргалын Энхжин амжилттай барилдаж Ази тивийн аварга боллоо.

         Түвшинжаргалын Энхжин дөрөв ялж алтан медаль хүртсэн байна.Тэрбээр финалд Энэтхэгийн Батериг 3:2-оор ялж алтан медалийн тавцанд зогссон. Түүний хувьд монголын бөхчүүдээс энэ насны ангилалд Азийн аварга болсон долоо дахь эмэгтэй тамирчин болж байгаа.

        Т.Энхжингээс өмнө 2019 онд нутгийнхаа дэвжээн дээр Ц.Намуунцэцэг, Б.Халиунаа, Б.Хонгорзул, Ө.Пүрэвсүрэн, өнгөрсөн жил Бишкект М.Мөнхгэрэл, Б.Отгонтуяа нар түрүүлж Ази тивийн аварга болж байв.