Баянхонгор аймаг дахь Үндэсний бөхийн холбоо энэ сарын12-ны өдөр хуралдав. Хурлаар тэргүүн С.Дарамсүрэн бүтэн жилийн амжилт, тайлангаа тавьснаар дараагийн тэргүүнийг сонгох тухай асуудлыг хэлэлцүүлэв. Хуралд “Их Богд” дэвжээ болон “Хонгор нутаг” бөхийн дэвжээнээс 60 бөх цахимаар, 19 гишүүн танхимаар оролцлоо. Баянхонгор аймгийн Үндэсний бөхийн холбооны тэргүүнд Засаг дарга Д.Мөнхсайханыг дэвшүүлснээр нийт хуралдаанд оролцогч 79 бөх 100 хувь дэмжиж, тамга тэмдгийг шинэ тэргүүнд албан ёсоор гардуулан өгсөн байна.

            Баянхонгор аймгийн Засаг дарга, Үндэсний бөхийн холбооны тэргүүн Д.Мөнхсайхан “Монгол үндэстний дархлааг хамгаалж өнгөлж яваа нутгийн эрхэм бөхчүүд та бүхнийхээ санал санаачилгаар энэ холбоог тэргүүлэхээр боллоо. Баянхонгор аймгийн бөхчүүдийн эв нэгдэл, бат найрамдлыг ямагт хангаж , амжилт ололтыг ахиулахын тулд зөв менежментийг явуулж, зөв санал санаачилга бүрийг дэмжин, хичээж хамтран ажиллах болно” гэжээ.