Үндэсний соёл амралтын хүрээлэн буюу Хүүхдийн паркад энэ сарын 16-17-ны өдрүүдэд буюу ирэх баасан, бямба гарагт "Mayor’s Ulaanbaatar Challenger” 3х3 сагсан бөмбөгийн Дэлхийн гранпри тэмцээн зохион байгуулагдана.

         Тус тэмцээн нь олон улсын сагсан бөмбөгийн холбооны Парис 2024 олимпын эрхийн оноо олгох албан ёсны цуврал тэмцээнүүдийн нэг юм.
Энэ жилээс уламжлал болгон тус тэмцээнийг хотын аялал жуулчлалыг спортоор дамжуулан хөгжүүлэх үүднээс Улаанбаатар хотын засаг даргын тамгын газар дэмжин хамтран зохион байгуулж эхэллээ.

         Тэмцээнд дэлхийн шилдгүүд болох Сербийн “UB”, Бельгийн “Антверп”, Латвийн “Рига”, БНХАУ-ын “Футион”, АНУ-ын “Харлем”, Канадын “Торонто”, Польшийн “Лүблин”, Литвийн “Мариянпол”, Литвийн “Каунас” багууд дээр Монголын “Улаанбаатар ММС Энержи”, “Сансар ММС Энержи”, “Амгалан”, “Баянгол Бронкос”, “Отгонтэнгэр Бродерс” багууд нэмэгдэн өрсөлдөнө.