“Олимпын боловсрол ба бие бялдрын хүмүүжил” сэдэвт болзолт уралдааныг 2023 оны нэгдүгээр сарын 15-наас тавдугаар сарын 15-ны өдрүүдэд улс орон даяар зарласан билээ. Болзолт уралдаанд үр дүн, идэвх санаачилгатай ажиллаж, аймаг, дүүрэг тус бүрээс шалгарсан шилдэг арга зүйч, багш нарын сургалт семинар зургадугаар сарын 7-9-ний өдрүүдэд Хандгайт дахь “Олимп” цогцолборт боллоо.

         Сургалт олимпын зөвлөл ба олимпын танхимуудын үйл ажиллагааг эрчимжүүлэх, олимпизмын үндсэн зарчмууд, олимпын соёл, боловсролыг сурагчдад эзэмшүүлэх, биеийн тамирын хичээлийн хөтөлбөрийн асуудал зэрэг сэдвийн хүрээнд онол, багийн дадлага ажил хосолсон хэлбэрээр өрнөсөн юм.

       Семинарт оролцогч багш нарын зүгээс биеийн тамирын багш нарыг олон талаар дэмжсэн, хүүхэд залууст олимпын боловсрол эзэмшүүлэх ажлын чанар, үр дүнг нэмэгдүүлсэн Болзолт уралдааныг онцолж, цаашид ижил төстэй арга хэмжээнүүдийг тогтмол зохион байгуулахыг уриалав.