Чөлөөт бөхийн 2023 оны ДАШТ-д оролцох тамирчдыг тодруулах сорилго барилдааныг ирэх долоодугаар сарын 29-30-ны өдрүүдэд МЧБХ-оос хийхээр болсон. Тус шийдвэр нь багш дасгалжуулагч, тамирчдын дургүйцлийг төрүүлээд байгаа юм.  Сорилго барилдаан зарласныг эсэргүүцэж байгаагаа илэрхийлэн  П.Орхон, Т.Тулга, Т.Түвшинтулга, Б.Болортуяа тэргүүтэй улсын аварга болсон тамирчдын төлөөлөл хэвлэлийн бага хурал хийв. Тэд МЧБХ-ны өмнө тулгараад байгаа нөхцөл байдлын талаар мэдээлэл хийлээ.

Дэлхийн аварга, МУГТ  П.Орхон:

Монголын чөлөөт бөхийн тамирчдын ирээдүйгээр тоглох эрх МЧБХ-ны удирдлагад  байх ёсгүй. Миний хувьд хувийн зардал, тусалж дэмждэг хүмүүсийнхээ ачаар өдийг хүртэл явлаа. Холбооноос 2022-2023 онд нэг ч төгрөгөөр дэмжээгүй. Одоогоор гадаадын 4-5 тэмцээнд явахдаа 40-50 сая төгрөг зарлагдаад байна. Миний хувьд энэ жилийн амжилт бол улсын аварга боллоо. Азийн аваргад финалдсан. Бишкек чансааны тэмцээнд мөнгөн медаль хүртлээ . Одоо дэлхийн аваргадаа явна гэж бодож байтал " Сорилго" барилдаан хийнэ гэж үндэсгүй зүйлийг хэн ч томилоогүй Мэргэжлийн зөвлөл гаргажээ. Өнгөрсөн жил 2022 онд улсын аварга болсон тамирчид сорилго барилдаан хийхгүйгээр шигшээ багтаа ороод дэлхийн аваргадаа барилдсан. Энэ жил 2023 онд улсын аварга болсон тамирчдыг ялгаварлан гадуурхаж байна.

Өнгөрсөн хугацаанд Чөлөөт бөхийн холбоог шинэчлэгдэх байх гэсэн хүлээлттэй байсан. Гэтэл ямар ч өөрчлөлт гарсангүй. 2022 онд сонгогдсон Чөлөөт бөхийн холбооны ерөнхийлөгч энэ салбарт нэг ч ажил хийгээгүй. Ганц хийсэн ажил нь мэргэжлийн зөвлөл байгуулсан. Холбооны удирдлагууд тамирчин, багш, дасгалжуулагч нарынхаа үгийг сонсдоггүй. Холбоо ямар ч уялдаа холбоогүй ажилладаг. Өнгөрсөн жил Азийн аварга шалгаруулах тэмцээнийг монголд зохион байгуулсан. Гэтэл холбооноос Азийн аваргын санхүүгийн тайлан мэдээллийг өнөөдрийг хүртэл хийгээгүй байгаа. Чөлөөт бөхийн холбооны санхүү, хөрөнгийн мэдээлэл шилэн биш байгаа.

Олимп, дэлхийн хүрэл медальт, МУГТ Б.Болортуяа:

Чөлөөт бөхийн холбоо тамирчдаа дэмждэггүй юмаа гэхэд ядаж гадаадын тэмцээн уралдаанд байр эзэлсэн шагналынх нь мөнгийг өгдөг болох хэрэгтэй. Олон улсын тэмцээний шагналыг Чөлөөт бөхийн холбооноос өрөндөө өгсөн гээд өгдөггүй. Хэн энэ асуудлыг шийдэх талаар асуухаар тэр мэднэ, энэ мэднэ гээд нэг, нэг рүүгээ чихээд алга болчихдог. Гомдол, санал хэлэхээр хүлээж авдаггүй. Тамирчидынхаа шагнал урамшууллыг худлаа хэлж пайз зүүлгэлгүй дор дор нь шийдээд өгчихдөг тийм л холбоог хүсэж байгаа шүү.

Дэлхийн аваргын хүрэл медальт, ОУХМ Т.Тулга:

Бид хэн нэгнийг гутаан доромжлох гэж биш, хэн нэгэн рүү дайрах гээгүй. Тамирчин биднийг үнэхээр ойлгохгүй байгаа дэмжихгүй байгаа. Тийм болохоор өөрийн үзэл бодлоо илэрхийлж байгаа шүү. Үе үеийн чөлөөт бөхийн ахмад тамирчид бөхийн төлөө хүчин зүтгэгчид хөгжөөн дэмжигчдээсээ уучлалт хүсье. Монголын чөлөөт бөхийн холбоо, Дэлхийн бөхийн нэгдсэн холбоонд 1.4 тэрбум төгрөгийн өртэй гэсэн. Холбооны шинээр сонгогдсон ТУЗ-ийн гишүүд энэ их өрнөөс айгаад гараад явчихдаг. Мөн тамирчид гадаадын тэмцээнд оролцохдоо өөрсдөө зардлаа олж явдаг. Дэлхийн аваргад орохдоо компани, байгууллагын үүдийг сахиж, нутгийнхаа хүмүүсээс мөнгө гуйж байна. Олон улс, тив, дэлхийн тэмцээнд шигшээ багийн эмч явдаггүй . Зайлшгүй шаардлага гарсан үед бие биедээ дусал тариа хийдэг. Наад зах нь гэхэд л бид нэгэн жигд хувцасгүй. Тамирчдын жигд хувцас, өмсгөлийн асуудлыг шийдмээр байгаа. Тив, дэлхийн тэмцээнүүдэд Монгол шиг тамирчдадаа эрээн, мяраан хувцас өмсүүлдэг улс хаана ч байхгүй. Өнгөрсөн жил Б.Болортуяа, бид хоёр дэлхийн чансааг тэргүүлж байсан. Гэтэл заавал улсын аваргад түрүүлж байж ДАШТ явна гэсэн. Шахуу хуваарьтай дэлхийн чансааны тэмцээнүүдэд оролцоод сэргэлт авч чадалгүй УАШТ ороод хожигдсон. Б.Болортуяа УАШТ-д барилдаж байгаад бэртэл авсан. Ингээд бид ДАШТ явж чадаагүй. ДАШТ болохоос жилийн өмнө УАШТ-ийг хэзээ болох хуваарь, төлөвлөгөөг гаргасан байсан бол бид бэлтгэл, тэмцээн, сэргэлтээ зохицуулаад явна. Гэтэл гэнэт л шийдвэр гаргадаг. Бид хэзээ УАШТ болох, хэзээ ямар шийдвэр гарч өөрчлөгдөхийг мэддэггүй. МЧБХ-ны шийдвэр тодорхой биш байдаг.

Дэлхийн аваргын хүрэл медальт ОУХМ Т.Түвшинтулга:

Хамгийн гол нь Чөлөөт бөхийн холбоог үндсээр нь өөрчлөх шаардлагатай байгаа. Дэлхийн бөхийн нэгдсэн холбооны календарьчилсан тэмцээн уралдаан төлөвлөгөө жилийн өмнө гардаг.  Тэр төлөвлөгөөтэй уялдуулан бид бэлтгэл, сургуулилалт, сэргэлтээ тохируулах ёстой. Гэтэл манай холбоо дандаа зөрж, гэнэтхэн тэмцээнээ зохион байгуулдаг.  Бид тэмцээн уралдааны зардал мөнгийг байнга хувиасаа гаргана. Тэр болгонд мөнгө гаргаад байж чадахгүй шүү дээ. Нэг тэмцээнд оролцоход доод тал нь 5-6 сая төгрөг болдог. Үүнийг  холбооноос анхаарах шаардлагатай. Зардал, санхүүжилтийн асуудлаас болоод тэмцээндээ орж чадахгүй байх тохиолдол олон бий.