Монголын 3х3 сагсан бөмбөгт хамгийн тэгш тоглолттой “Лидер тамирчин” гэвэл Э.Дөлгөөнийг хэлэх байх. 2023 оны 3х3-ын ДАШТ-д манай шигшээ багт  түүний орон зай дэндүү их үгүйлэгдэж байлаа. Эрэгтэй багийн “Амжилтын түлхүүр” нь яах аргагүй “Дийлдэшгүй Монх” буюу Энхбатын Дөлгөөн юм байна.  Тэрбээр дөрөвдүгээр сард Монголын үндэсний дээд лигийн плэй-оффын хагас шигшээ цувралын тав дахь тоглолтын үеэрээ хоёр хуруугаа хугалж харамсалтай гэмтэл авсан.  Олон, олон хөгжөөн дэмжигчид “Дийлдэшгүй Монх минь хурдан эдгээд талбай дээрээ гялалзаад өгөөрэй” хэмээн хүсэж, хүлээж эхэллээ.

Э.Дөлгөөний эзгүйд Монголын 3х3 сагсан бөмбөгийн Үндэсний шигшээ багийн хувьд дөрөв, тавдугаар сарын цуврал тэмцээн, зургадугаар сарын ДАШТ-ий тоглолт унасан, амжилт буурсан байдал ажиглагдаж эхэлсэн. Шигшээ багт түүний орон зай үнэхээр үгүйлэгдэж байлаа. Түүний орон зайг нөхөх, хамгаалалт, довтолгоо, холбогч, шидэгч гээд багийн тоглолтын найруулгыг хийх чадвартай тэгш тоглолттой тоглогч одоогоор алга байгаа нь харамсалтай.

Монгол Улсын 3х3 сагсан бөмбөгийн Үндэсний шигшээ эрэгтэй баг дэлхийд тавд, Ази тивд нэгдүгээр байрт, Үндэсний шигшээ эмэгтэй баг дэлхийд 11, Ази тивд гуравдугаар байрт эрэмбэлэгдэж байна. Олон улсын сагсан бөмбөгийн холбоо FIBA-ноос 3х3 сагсан бөмбөгийн дэлхийн их дуулгын тэмцээний онцлох  арван тамирчинг нэрлэхэд манай тамирчин Энхбатын Дөлгөөн уг жагсаалтын гуравдугаарт бичигдсэн байв. Тус жагсаалтын эхний аравын   1. Душан Булут, 2. Богдан Драгович, 3. Энхбатын Дөлгөөн, 4. Саймон Финцгар, 5. Майкл Хикс, 6. Натан Юрковиц, 7. Карлис Ласманис, 8. Деян Майсторович, 9. Дэн Маврадид, 10. Стефан Стоячич  нар рэмбэлэгдсэн байх юм билээ.

Олон улсын сагсан бөмбөгийн холбоо FIBA-ын танилцуулгад манай тамирчинг  “Монголын Энхбатын Дөлгөөн бол Азийн сагсан бөмбөгчид 3х3 төрөлд Европын багуудын эсрэг ноёлж чадна гэдгийн баталгаа юм.  “Монголын энэ Од” Чингис хаан шигээ  “Ulaanbaatar MMC Energy” багаа удирдан дэлхийн их дуулгын Финалд шалгарч чадах уу. Тийм ээ. Тэр чадна. Тэр Хаан” хэмээн бичиж байлаа. Энхбатын Дөлгөөн нэр шигээ дөлгөөнхөн даруухан залуу. Харин сагсан бөмбөгийн талбайд “Арслан, бар шиг эрэмгий дайчин” багийн тоглолтын гол ачааллыг өөртөө авч зүтгэдэг “Зүтгүүр хүч, амжилтын хөдөлгүүр” нь болдог билээ.  Тэр 1992 оны гуравдугаар сарын 23-нд төрсөн. Энэ жил 31 настай, 1.90 метр өндөртэй. Монголын энэ цаг үеийн хамгийн шилдэг, үнэ цэнэтэй сагсан бөмбөгчдийн нэг яах аргагүй мөн.

“Монголчууд багийн спортод хэзээ ч амжилт гаргахгүй” гэсэн нийгэмд тогтсон  буруу хандлага, ойлголтыг  тэр үгүйсгэж чадсан юм. Монголын сагсан бөмбөгийг дэлхийд таниулахад түүний оруулсан хүчин зүтгэл цаглашгүй их билээ. Монголын хоёр хуваагдсан сагсан бөмбөгийн холбооны эв хагарсан үед тэр монголын сагсчдыг элит түвшинд дэлхийд өрсөлдөх боломжтой гэдгийг нотлон харуулж чадсан билээ.

FIBA World Tour Jeddah 2020 Dream Team-д шалгарч үлдсэн дөрвөн тамирчид

1. Игнас Вайткус /Utena Uniclub/ - Литва

2. Аурелиус Пукелис /Sakiai Gulbele/ - Литва

3. Анзе Сребовт /Piran/ - Словак

4. Энхбатын Дөлгөөн /Ulaanbaatar MMC Energy/  гээд тэр байж л байлаа.

Энхбатын Дөлгөөн, Готовын Цэнгүүнбаяр, Даваасамбуугийн Дэлгэрням, Энхтайванын Цэрэнбаатар энэ дөрвөн залуу Монголын 3х3 сагсан бөмбөгийг “Дэлхийд тамгалсан” авьяаслаг, хүчтэй, тэсвэр хатуужилтэй, сэтгэлийн тэнхээтэй, хөдөлмөрч залуус билээ. Тэд Азийн аварга цолыг анх авчирч багийн спортод монголчууд амжилт гаргаж болох юм байна гэсэн итгэл үнэмшлийг бий болгосон.

Ази тивийн хошой аварга баг болох үед “Дийлдэшгүй Монх” Э.Дөлгөөн мөн л багийн гол “Түлхүүр тоглогч” гэдгээ харуулсан. Харин одоо түүний эзгүйд багийн амжилт “Шалдаа бууж, шалан дээр үлдэж” байна. Байнга шахуу хождог байсан Японы багийг ч дийлэхгүй болжээ. Э.Дөлгөөн шиг олон талын ур чадвартай тэгш тоглогчийг бэлтгэн гаргах хэрэгтэй юм байгаа харагдлаа. “Дийлдэшгүй Монх” минь хурдан эдгэрч багтаа ирээрэй.