Киргизстаны Бишкект хотод Каба Уулу Кожомкул болон Раатбек Санатбаевын нэрэмжит дэлхийн чансааны оноо олгох тэмцээн болж байна. Өчигдөр дэлхийн чансааны оноо олгох энэ жилийн гурав дахь цуврал тэмцээний эмэгтэйчүүдийн 62 кг-ын жинд "Алдар" спорт хорооны хоёр бүсгүй дэлхийн аварга, Азийн аварга, гавьяат тамирчин Пүрэвдоржийн Орхон мөнгө, ДАШТ-ий алт, мөнгөн медальт, гавьяат тамирчин Сүхээгийн Цэрэнчимэд хүрэл медаль авлаа. Мөн Азийн аварга шалгаруулах тэмцээний нэг мөнгө, хоёр хүрэл медальт, Үндэсний шигшээ баг, "Хүч" спорт хорооны тамирчин ОУХМ Энхсайханы Дэлгэрмаа  68 кг-ын жинд мөнгөн медалийн эзэн болов.

       П.Орхон Бишкекийн дэвжээнд финалд “U23” насны ДАШТ-ий хоёр мөнгөн медальт, Европын хошой аварга Украины Илона Прокопевниукт 8:3-аар ялагдаж мөнгөн медаль авсан. С.Цэрэнчимэд хүрэл медалийн төлөөх барилдаанд Европын аваргын мөнгө, хүрэл медальт Германы Луиза Хелга Нимешийг 8:3-аар ялсан байна.

        Харин Э.Дэлгэрмаа үдээс өмнө тэгшитгэлд Узбекистаны Светлана Окназароваг 11:0-ээр цэвэр, шөвгийн наймд Канадын Оливиа Ди Бакког 6:1-ээр, хагас шигшээд "Токио-2020" олимпын хүрэл медальт, "Осло-2021" дэлхийн аварга дэвжээний эзэн орон Киргизстаны Мээрим Жуманазароваг 2:1-ээр тус тус ялсан. Улмаар шигшээ барилдаанд ДАШТ-ий мөнгө, хүрэл медальт, Азийн хошой аварга БНХАУ-ын Зоу Фенгэд 14:5-аар ялагдаж мөнгөн медаль хүртлээ.