Тэр бол монгол мөрөөдөл. Монгол хүн хамгийн алдартай мэргэжлийн сагсан бөмбөгийн лигт тоглох найдвар. Түүний мөрөөдөл бол монголын найдвар. Тэр бол Ш.Энхийн-Од, түүх бүтээх нэгэн.

                        Эх орондоо болсон 18-аас доош насны сагсан бөмбөгийн 3х3 төрлийн дэлхийн аварга шалгаруулах тэмцээнд оролцож, хамгийн олон оноог авч “гялалзаж” байснаас эхлээд сагсан бөмбөг сонирхогчид гэлтгүй монгол түмэн түүнийг андахгүй. Тэр дундаа сагсан бөмбөгийн спорт үүсэж, хөгжсөн, өнөөгийн дэлхийн хамгийн хүчирхэг АНУ-ын шигшээ багийн шилдгүүдийн эсрэг цагирган дээрээс довтолж оноо авах тамирчин тэр бүр үгүй. Харин тэр үгүй зүйлийг Ш.Энхийн-Од 17-хон насандаа бүтээж, монголын сагсан бөмбөгийн найдварыг харуулж, хэдийнэ монгол сагсан бөмбөг, өөрийнхөө ч түүхийг бүтээж эхэлсэн билээ.

-МОНГОЛЫН САГСАН БӨМБӨГ=Ш.ЭНХИЙН-ОДЫН ТҮҮХ-

Ш.Энхийн-Одыг гурван үе дамжсан сагсан бөмбөгч гэдгээр нь монголчууд андахгүй. Түүний аав Ц.Шаравжамц Монголын анхны мэргэжлийн тамирчин. Бүр “Harlem Globetrotters”-ын анхны Ази тоглогч. Ш.Энхийн-Одын өвөө Цэрэнжанхар гуай Монголын сагсан бөмбөгийн шигшээ багт тоглож байсан анхны шилдэг тамирчдын нэг.

                Харин Ш.Энхийн-Одын хувьд найман наснаасаа эхлэн сагсан бөмбөгөөр хичээллэж эхэлсэн гэдэг. Тэрбээр барууны нэг сайтад өгсөн ярилцлагадаа “Надад бууж өгөхийг хүссэн үе олон байсан. Гэхдээ багаасаа л шартай хүүхэд байсан болохоор бууж өгөх биш давж, ялан дийлэхийг хүсдэг” тухайгаа дурссан байдаг. Шартай л хүүхэд байсан учраас илүү ихийг сурч, хөдөлмөрлөж, ялан дийлэхийг хүсдэг биз. Ш.Энхийн-Од өсвөрийн сагсан бөмбөгийн УАШТ-д найман удаа түрүүлж, дөрвөн мөнгө, нэг хүрэл медаль хүртэж, долоо удаагийн шилдэг тоглогчоор шалгарч байлаа.  Харин одоо монголчуудын хүсэл, найдварыг тээж яваа хүү бүхний хүслийг, өөрийнхөө ч мөрөөдөлд хүрэхээр хилийн чинадад үе тэнгийнхээ сагсан бөмбөгийн шилдгүүдтэй өрсөлдөж яваа.

-БРОННИ ЖЕЙМСТЭЙ ТОГЛОЖ, ЯЛАЛТ БАЙГУУЛСАН НЬ-

Сагсан бөмбөгийн 3х3 төрлийн тоглолтуудын дараахан даа. Ш.Энхийн-Од NBA-ийн гурван удаагийн аварга Дэнни Гриний зохион байгуулсан “The Battle: Summer Showcase” тэмцээнд орсон. Гэтэл тэмцээн дээрээ нэрт сагсан бөмбөгч ЛеБрон Жеймсийн хүү 2024 оны драфтаар NBA-ийн тамирчин болохоор зэхэж буй Бронни Жеймстэй учраа таарч тоглодог байгаа.  Монгол дахь сагсан бөмбөг сонирхогчдын төсөөлөөгүй тоглолт. Харин Ш.Энхийн-Од “Midwest” багийнхаа хамтаар Бронни Жеймсийн багийн буулгаж аваад зогсохгүй тойргоор тоглосон бүх тоглолтдоо ялалт байгуулж, тэмцээний шилдэг баг болсон юм. Тэр дундаа Ш.Энхийн-Од багтаа хэрхэн чухал үүрэг гүйцэтгэж, түлхүүр дамжуулалт, тоглолт хийж байсныг дэлхий харсан билээ.

-ААВЫН ХҮҮ, ДЭЛХИЙН ТОГЛОГЧ МОНГОЛ МАЙК-

Ш.Энхийн-Од ахлах сургуулиа амжилт дүүрэн төгссөн. ESPN-ээс нэрлэдэг ахлах сургуулийн шилдэг 100 тоглогчийн нэгээр нэрлэгдэж, Дэйтоны их сургуулиас тэтгэлэг авсан нь түүнийг NCAA-ийн I дивизионы “Dayton Flyers” багт тоглох боломж болсон. NCAA-ийн I дивизионд тоглох нь бүү хэл уг дивизионд тоглодог сургуулиас тэтгэлэг авна гэдэг хэр баргийн аавын хүүгийн хүрээд байдаггүй амжилт. Харин Ш.Энхийн-Од хүрч чадсан.

                   NCAA-ийн I дивизионы тоглолт эхлэхэд Ш.Энхийн-Од олонх чухал тоглолт гараанд гарч тоглов. Өндөр нуруутайн дээр дамжуулах, найруулах ур чадвар сайтайг нь дасгалжуулагчид магтаж, тэрбээр ч багтаа чухал тоглолтуудыг гүйцэтгэсэн. Холбогч, хамгаалагчийн байрлалдаа дундаа өндөр нуруутай, холболт, найруулалт нь сайн, хамгаалалтдаа жигд, шидэхдээ шиддэг Ш.Энхийн-Од шиг “бүхнийг чаддаг” тоглогч “Dayton Flyers” багийнхаа шилдгүүдийн нэгээр шалгараад болоогүй Дэйтон хотын иргэдийн хайртай хөвгүүдийн нэг болжээ.

Ш.Энхийн-Од амьдралынхаа хамгийн чухал шийдвэрүүдийн нэгийг гаргаснаас хойш хоёр сарын хугацаа өнгөрч байна. NCAA-д ердөө нэг жил тоглоод NBA-ийн драфтад нэрээ өгнө гэдэг маш том эрсдэл. Драфтад нэрээ өгснөөр мэргэжлийн тоглогч болох замналаа хөөж, дахин NCAA-д тоглох боломжгүй болно гэсэн үг л дээ. Гэхдээ Ш.Энхийн-Одод тийм эрсдэл туулахгүй байж болох талаар АНУ-ын коллежийн сагсан бөмбөгийн аналистууд ярьж байна. Саяхан болсон NBA-ийн G-League-н танилцуулах өдөрлөгөөр ур чадвар, практикын тоглолтуудаа ч тултал нь хийсэн гэнэ. Тиймээс NBA-ийн драфтад нэрлэгдэх боломж өндөр болоод байгаа юм байна. Тэр бол Ш.Энхийн-Од. Монголын түүхийг, монгол сагсан бөмбөгийн түүхийг бүтээх хүү.