Өнөөдөр Токио 2020 олимпын хүрэл, Нур Султан 2019 ДАШТ-ий хүрэл медальт, “Женко” клубийн тамирчин, Монгол Улсын гавьяат тамирчин Бат-Очирын Болортуяагийн төрсөн өдөр тохиож байна. Тэрбээр 2019 онд Казахстан Улсын нийслэл Нур-Султан хотод болсон чөлөөт бөхийн ДАШТ-ий эхний тойрогт Энэтхэгийн Лалитаг 10:3-аар ялаад шилдэг 16-д Пан Америкийн аварга шалгаруулах тэмцээний хүрэл медальт АНУ-ын Винчестерт ялагдсан. Харин дагах тойргийн барилдаанд Киргизстаны Мадина Надироваг  эхний үед 10:0-ээр оноогоор цэвэр ялсан юм. Улмаар дэлхийн аваргын хүрэл медалийн төлөө Туркийн Бедиха Гуныг 12:9-ээр буулган авч дэлхийн медальтан болсон  билээ.

      Харин Токио 2020 олимпын наадмын хүрэл медалийн төлөө  Б.Болортуяа, Камеруны бөх, Африк тивийн долоон удаагийн аварга Т. Эссомбег 14:4-өөр оноогоор цэвэр ялж, олимпын дөрөв дэх медалийг хүзүүндээ зүүсэн юм. Эхэндээ хоёр оноо алдсан ч, маш тайвнаар барилдаанаа үргэлжлүүлж, хүч мэхээр давамгайлан ялалт байгуулж, монголчуудын цорын ганц найдвар болж үлдсэн чөлөөтийнхний нэрийг хамгаалж чадсан юм. Ийнхүү тэрбээр чөлөөт бөхийн олимпын наадмаас 10 дахь медалийг, эмэгтэй тамирчдаас олимпын наадмаас медаль хүртсэн хоёр дахь эмэгтэй бөх болсон билээ.