Жүдо бөхийн 2023 оны ДАШТ-ий хувийн барилдааны эмэгтэй, эрэгтэй долоо, долоон жингийн аваргууд өчигдөр тодорч дууссан. Өнөөдөр холимог багийн барилдаан явагдаж ДАШТ-н өндөрлөнө. Холимог багийн барилдааны үхлийн хэсэг буюу “А” хэсгийг Япон Улсын баг толгойлон барилдана. Энэ хэсэгт Япон, Өмнөд Солонгос, Монгол, Гүрж, Бразил Улсын багууд байна. Манай улсын баг нэгдүгээр тойрогт Гүржийн хүчирхэг багтай таарсан. Тэднийг буулган авч чадвал хоёрдугаар тойрогт Бразилын хүчтэй багтай үзнэ. Хэрэв ялах юм бол хэсгийн аваргын төлөө Японы багтай таарах магадлалтай байгаа.

          “В” хэсгийг Нидерланд Улсын баг тэргүүлэн барилдана. Энэ хэсэгт Нидерланд, Куба, Узбекистан, IJF-ийн нэр дор орж буй ОХУ-ын баг байна. Харин “С” хэсгийг Францын баг толгойлон барилдах аж. Энэ хэсэгт Франц, Литав, Болгар, Румын Улсын багууд байна. Хамгийн сул хэсэг буюу “D” хэсгийг Герман Улсын тэргүүлэн барилдана. Энэ хэсэгт Герман, Казахстан, Мороко, Грек, Австри Улсын багууд оржээ.