Жүдо бөхийн Үндэсний шигшээ баг, “Хилчин” спорт хорооны тамирчин, ОУХМ Ё.Басхүү ДАШТ-ий 66 кг-ын жинд хүрэл медаль хүртлээ. Тэрбээр нэгдүгээр тойрогт гоц мөргөн хийлж ялалт авсан. Хоёрдугаар тойрогт  Абрек Нагучевийг торгуулиар сөхрүүлсэн. Шөвгийн наймд үлдэх барилдаанд Румын Улсын жүдоч Dimitrescu Lucian Bors-ыг шахаж татан, цэвэр ялж шөвгийн наймд шалгарсан.

           Шөвгийн наймд Италийн Манзийг цэвэр ялж шөвгийн дөрөвт үлдсэн. Шөвгийн дөрөвт Японы дэлхийн аварга Жоширо Маруяамад нэмэлт цагт ялагдаж, хүрэл медалийн төлөө барилдах эрхтэй болсон юм. ДАШТ-ий хүрэл медалийн төлөө Токиогийн олимпын мөнгө, ДАШТ-ий хүрэл медальт Гүржийн Vazha Margvelashvili-тай барилдсан. Тэд үндсэн цагт үнэлгээ аваагүй. Нэмэлт цагт Ё.Басхүү Гүржийн Vazha Margvelashvili-ийг даралтаар цэвэр ялж, дэлхийн аваргын хоёр дахь хүрэл медалиа авлаа.