Монгол Улсын гавьяат тамирчин Б.Болдын нэрэмжит чөлөөт бөхийн зургаа дахь удаагийн мастеруудын улсын аварга шалгаруулах тэмцээн болж байна. Тус УАШТ-д Азийн аваргын мөнгө, хүрэл, Зүүн Азийн наадмын мөнгөн медальт, Төв аймгийн Сэргэлэн сумын харьяат, гавьяат тамирчин, дархан аварга Агваансамдангийн Сүхбат “D” ангиллын 100 кг-ын жинд хүч үзэж барилдаж байгаа юм. А.Сүхбат аварга 23 жилийн дараа чөлөөт бөхийн дэвжээн дээрээ гарч байгаа. А.Сүхбат аварга ердөө сар гаруйн өмнөөс Монголын чөлөөт бөхийн мастеруудын холбооны ерөнхийлөгчөөр ажиллах болсон. Түүний хувьд хамгийн сүүлд 2000 оны насанд хүрэгчдийн улсын аваргад 97 кг-ын жингийн финалд ОУХМ Ганзоригийн Ганхуягийг ялж тав дахь түрүүгээ хүртэж байв.