“Олимпын боловсол ба бие бялдрын хүмүүжил” болзолт уралдааны хүрээнд зохиогдсон “Олимпизм, боловсрол, спорт” сэдэвт ерөнхий боловсролын сургуулиудын дундах олимпиад баасан гарагт Спортын төв ордонд боллоо. Тус арга хэмжээнд МҮОХ-ны тэргүүн дэд ерөнхийлөгч Ч.Наранбаатар оролцож, тамирчин сурагчдад амжилт хүсэв.

          Энэ удаагийн олимпиад өмнөх шатнаас шалгарсан шилдэг сургуулиудын аравдугаар ангийн сурагчдын дунд өрнөсөн юм. Олимпиад онолын мэдлэг, бие бялдрын ерөнхий бэлтгэлжилтийн сорил болон шилдэг бүтээлийн үзэсгэлэн, урлагийн үзүүлбэр гэсэн дөрвөн хэсгээс бүрдэж байв. Онолын мэдлэгийн шалгалтад эртний Грекийн олимпын наадам, олимпын хөдөлгөөн, олимпын үнэт зүйлийн сэдвээр өмнө нь өгсөн даалгаврын хүрээнд шалгалт авсан.

         Харин бие бялдрын ерөнхий бэлтгэлжилтийн шалгалтын хүрээнд гүйлт, байрнаас уртад харайх, гар дээр суниах, цагаригт бөмбөг шидэх болон багийн буухиа уралдаан зохиогдов. Дүн гарахад Баянгол дүүргийн “Эрдмийн-Ундраа” цогцолбор сургууль түрүүлж, Баянзүрх дүүргийн 14 дүгээр сургууль удаалан Сүхбаатар дүүргийн “Эрдмийн хөтөч” цогцолбор сургууль гуравт орлоо.