Самбо бөхийн залуучуудын дэлхийн аварга, Монгол Улсын гавьяат дасгалжуулагч Намсрайн Батлавын нэрэмжит жүдо бөхийн 2023 оны залуучуудын УАШТ Дархан-Уул аймагт явагдаж өндөрлөлөө. Нийт 23 байгууллагын 230 гаруй залуу жүдочин Дарханы татамид энэ сарын 21-23-ны өдрүүдэд хүч чадал, ур чадвараа сорин өрсөлдсөн юм.

        Монголын жүдо академи энэ тэмцээнд 16 тамирчны бүрэлдэхүүнтэй оролцож зургаан медаль хүртжээ. Тэд нэг алт, нэг мөнгө, дөрвөн хүрэл медаль хүртсэн сайхан амжилтыг үзүүлсэн байна.  Япон Улсад суралцаж байгаа Н.Жангарай -81 кг-н жинд аваргалсан бол У.Билэгт тус жингийн хүрэл медалийн эзэн болсон юм.

       Саяхан жүдо бөхийн спортын дэд мастерийн үнэмлэх тэмдгээ гардан авсан Х.Ариунтунгалаг (-57 кг) анхны залуучуудын УАШТ-ээсээ мөнгөн медаль хүртлээ. Мөн эмэгтэйчүүдийн 63 кг-д Г.Ундрал, -78 кг-д У.Нандинчимэг, эрэгтэйчүүдийн -100 кг-д Г.Хангарьд нар тус тус хүрэл медалийн болзол хангасан байна.

         Харин холимог багийн тэмцээнд “Жүдо академи”-ийн баг хүрэл медалийн төлөө шалгарсан ч харамсалтай нь ялагдал хүлээжээ. Өнгөрсөн 2022 оны Архангайн залуучуудын УАШТ-ээс “Монголын жүдо академи” гурван алтан медаль хүртэж эмэгтэйчүүд багаараа тэргүүн байр эзэлж байжээ.