ОХУ-ын Екатеринбург хотноо ирэх наймдугаар сарын 19-31-ний өдрүүдэд болох "Олон улсын оюутны спортын фестиваль"-д монголын баг тамирчид спортын 12 төрөлд 130 орчим хүний бүрэлдэхүүнтэй оролцохоор бэлтгэл ажлаа хангаж байна. Фестивалийн Зохион байгуулах хороо, Оросын оюутны спортын холбооноос Монголын баг тамирчдыг оролцохыг тусгайлан урьсан юм байна.

             Уг наадамд БРИКС, Шанхайн хамтын нийгэмлэг, Тусгаар тогтносон улсуудын хамтын нийгэмлэгийн гишүүн болон бусад орнуудыг оролцуулах болсон гэнэ. Одоогоор наадамд 30 гаруй орны баг тамирчид оролцохоор ерөнхий мэдүүлгээ гарган өгчээ. Наадам спортын 14 төрлөөр бадминтон, бокс, волейбол, жүдо, сагсан бөмбөг 3х3, самбо, уран сайхны гимнастик, усанд үсрэлт, усанд сэлэлт, таеквондо, теннис, футзал, ширээний теннис, чөлөөт бөхийн төрлөөр болно.

             Наадмын үер Екатеринбург хотод шинээр баригдсан болон засварласан спортын 10 гаруй байгууламж, спортын ордон, цэнгэлдэх хүрээлэн, хотын үзэсгэлэн чимэглэлийн газар зэрэг дэлхийн стандартын төвүүдэд фестивалийн тэмцээнүүд явагдана. Баг тамирчдыг нэгдсэн шугамаар Уралын холбооны их сургуулийн /УПИ/ хотхонд шинээр баригдсан тамирчдын тосгонд байрлуулах юм. Ойролцоогоор 6000 орчим төлөөлөгчдийг хүлээн авахаар ОХУ-ын Засгийн газраас тусгайлан бэлтгэсэн байна.

           Наадамд оролцох гадаадын орнуудын баг тамирчдын хоол, байрны зардлыг ОХУ-ын тал бүрэн хариуцахаар болжээ. Энэ онд Екатеринбург хот байгуулагдсны түүхэт 300 жилийн ойн болж, төрөл бүрийн соёл, олон нийтийн ажил фестиваль наадмын үер болох ба эдгээр арга хэмжээнд төлөөлөгчид оролцоно. Наадамд оролцох хүмүүс нь 18-25 насны 1998-2005 оны хооронд төрсөн, их, дээд сургуульд сурч байгаа, оюутан байх шаардлагатай юм. Монгол Улсаас оролцох баг тамирчдыг Монголын оюутны спортын холбоо /МОСХ/-ноос хариуцан зохион байгуулж байна.

           МОСХ нь тус фестивальд оролцох шийдвэрээ гаргаж, ОХУ-д талд мэдэгдсэн байна. Монголын баг тамирчдыг сонгон шалгаруулах тэмцээнийг 2023 оны оюутны УАШТ-ий үер хийн тодорхойлж, тэмцээний алтан медаль хүртсэн шилдэг баг тамирчдад эрхийг нь олгож эхлээд байна. Одоогоор наадамд Монгол Улсаас оролцох эрэгтэй, эмэгтэй волейбол, жүдо, таэквондо, ширээний теннис, чөлөөт бөхийн баг тамирчдыг тодорч, МОСХ-ноос эрхийг нь олгоод байна.

           Удахгүй явагдах футзал, сагсан бөмбөг 3х3 төрлөөс баг тамирчдыг сонгох ба бусад тамирчдыг спортын тухайн төрлийн холбоодтой ярилцан сонгон авна Багийн спортын төрөлд тухайн их сургуулийн багийг сонгон, тухайн сургуулийн өөрийн нь нэр дээр оролцуулна. Ганцаарчилсан төрөлд оролцох тамирчид улсынхаа нэрийн өмнөөс хүчээ үзэн, ур чадвараа сорин өрсөлдөнө.