“Улаанбаатар-2023” Зүүн Азийн залуучуудын наадмын багийн ахлагч нарын хурал “Туушин” зочид буудалд боллоо. Хоёр өдөр үргэлжилсэн тус хуралд Зүүн Азийн бүс нутагт хамаарах есөн Үндэсний олимпын хорооны төлөөлөл оролцсон байна. Хурлын үеэр наадмын бэлтгэл ажлын явцыг танилцуулж, оролцогчдод зохион байгуулалтын талаар дэлгэрэнгүй мэдээлэл өгчээ. Тухайлбал, хурлын эхний өдөр спортын төрөл, барилга байгууламж, бүртгэл, байрлах зочид буудал, сайн дурын ажилтнууд, тээвэр, аюулгүй байдал, хоол хүнсний талаар мэдээлэл өгсөн байна.

       Мөн хурлаар нээлт, хаалтын ёслол, допингийн шинжилгээ, тасалбарын борлуулалт, соёлын хөтөлбөрийн талаар танилцуулахаас гадна хөлбөмбөг, волейболын спортын сугалаа явагджээ. Зүүн Азийн залуучуудын II наадам 2023 оны наймдугаар сарын 16-23-ны өдрүүдэд Улаанбаатар хотноо спортын 11 төрлөөр зохиогдох билээ. Наадмын хөтөлбөрт сагсан бөмбөг (3х3 болон 5х5), хөлбөмбөг, волейбол, бадминтон, ширээний теннис, электрон спорт, таэквондо, хөнгөн атлетик, жүдо бөх, чөлөөт бөх, боксын спорт багтсан байна.