Хүндийн өргөлтийн ОУХМ, ОБЕГ-ын “Аврагч” спорт хорооны тамирчин Ганзоригийн Анужингийн төрсөн өдөр өнөөдөр тохиож байна. ОУХМ Г.Анужин 1998 оны энэ өдөр Говь-Алтай аймгийн Баян-Уул суманд төржээ. Тэрбээр хөнгөн атлетикаар хичээллэж байгаад 2013 оноос хүндийн өргөлтийн спортоор хичээллэж эхэлсэн байдаг.

         Анх Тайланд Улсад болсон олон улсын тэмцээнд Монгол Улсын дээд амжилтыг шинэчлэн тогтоож байлаа. 2017 оны хүндийн өргөлтийн насанд хүрэгчдийн УАШТ-ны эмэгтэйчүүдийн 63 кг-д алтан медаль хүртсэн. 2017 онд Тайландын Эзэн хааны нэрэмжит хүндийн өргөлтийн "Дэлхийн цом"-ын нэр хүндтэй тэмцээнээс Г.Анужин 63 кг-д огцом өргөлтөөр 87 кг, түлхэлттэй өргөлтөөр 108 кг өргөж алтан медаль хүртэж байв.

          Мөн 2017 онд БНСУ-ын Яангүг хотод болсон хүндийн өргөлтийн Азийн аварга шалгаруулах тэмцээнээс  Г.Анужин хүрэл медаль хүртэж  байсан юм. 2017 оны насанд хүрэгчдийн ДАШТ-д эмэгтэйчүүдийн 63 кг-д Г.Анужин оролцож огцом өргөлтөөр 87 кг, түлхэлттэй өргөлтөөр 106 кг-ыг өргөж, нийлбэр дүнгээр 193 кг-аар “В” хэсэгтээ есдүгээр байр эзэлж байлаа.

       2018 онд Польш Улсын Биала Подласка хотод болсон хүндийн өргөлтийн оюутны ДАШТ-ээс 63 кг-ын жинд түлхэлттэй өргөлтөөр мөнгөн медаль хүртсэн. Г.Анужин Монголын оюутны спортын холбооны 2018 оны “Шилдэг оюутан тамирчин” болсон юм.Ид өсөж яваа залуу тамирчин Г.Анужиндаа цаашдынх нь тэмцээн уралдаанд өндөр амжилт хүсэж олимп, дэлхийн аварга болохыг ерөөе.