Төв аймгийн Зуунмод хотод самбо бөхийн 2023 оны өсвөр үеийн Монгол Улсын аварга шалгаруулах тэмцээн болж хот хөдөөгийн 50 гаруй багийн 1460 хүүхэд хурд хүч авхаалж самбаагаа сорин өрсөлджээ. Тус тэмцээнд Төв аймгийн Баянчандмань сумын “Чандмань-Оргил дэвжээ”-ний тамирчид найман алт, гурван мөнгө, хоёр хүрэл медаль хүртэж ахлах болон сурагчдын насны ангилалд эрэгтэй, эмэгтэй багийн дүнгээр тэргүүлж улсын аварга баг болсон байна.

           Харин эрэгтэй багийн дүнгээр хоёр жил дараалан Монгол Улсын аварга багаар шалгарч бахдам сайхан амжилт гаргажээ. Мөн бага насны охидын 43 кг жинд алтан медаль хүртсэн Б.Бумхишиг тус тэмцээний “Шилдэгийн шилдэг тамирчин”-ын шагналыг хүртсэн байна. Тэмцээний үеэр “Чандмань-Оргил дэвжээ”-ний багш Э.Доржпүрэв, Н.Буянхишиг, Баянчандмань сумын Засаг дарга Г. Ариунболд нар МҮОХ-ны алтан медалиар шагнагдсаныг МҮОХ-ны гадаад харилцаа хариуцсан зөвлөх, МСБХ-ны ерөнхийлөгч, бригадын генерал Д.Гэрэл гардуулан өглөө.

           Улсын аваргын охидын бага насны 43 кг-ын жинд Б.Бумхишиг,  Г.Алтанбагана хөвгүүдийн.бага насны 42 кг-д, Б.Сүхбат сурагчдыг хөвгүүдийн 46 кг-д, Б.Чинхүслэн сурагчдын хөвгүүдийн 49 кг-д, Н.Болдсайхан сурагчдын хөвгүүдийн 53 кг-д, С.Очиртуяа сурагчдын охидын 44 кг-д, С.Заяа ахлах насны хөвгүүдийн 71 кг-д, Н.Ундрахбаяр ахлах нас охидын 47 кг-д алтан медаль авчээ.  Мөнгөн медалийг  А.Төгөлдөр  хөвгүүдийн бага насны 38 кг-д, Б.Буянбилэг охидын.бага насны 34 кг-д, Б.Анхгэрэл бага насны охидын 51 кг-д хүртсэн байна. Харин хүрэл медалийг  Э.Хувьзаяа бага насны хөвгүүдийн 55 кг-д, Б.Арвин ахлах насны охидын -72 кг-д нар хүртжээ.