Насанд хүрэгчдийн боксын эрэгтэйчүүдийн ДАШТ тавдугаар сарын 1-14-ны өдрүүднд Узбекистан Улсын нийслэл Ташкент хотод болно. Одоогийн байдлаар тус ДАШТ-д 104 орны 640 боксчин 13 жинд өрсөлдөхөөр мэдүүлгээ өгсөн гэж Олон улсын сонирхогчдын боксын холбооноос мэдээллээ.

         Энэ удаагийн ДАШТ-д ОХУ, Беларусийн тамирчид оролцож байгаа тул барууны зарим орон бойкот зарлаад байгаа. Тухайлбал, АНУ, Их Британи, Польш, Швейцар, Нидерланд, Ирланд, Чех, Швед, Канад, Украины шигшээ дэлхийн аваргад оролцохгүй гэж мэдэгдээд байгаа юм. Энэ байдлаас шалтгаалан ДАШТ-ий мэдүүлэг авах хугацааг дөрөвдүгээр сарын 14 хүртэл сунгажээ.

          Манай улсын боксын эрэгтэй  шигшээ багийн тамирчид Узбекистаны Ташкентэд гуравдугаар сарын 20-ноос хойш хамтарсан бэлтгэл хийж байгаа. Тэд энэ сарын 30-ны өдөр хамтарсан бэлтгэлээ өндөрлүүлээд дэлхийн аваргын тэмцээндээ орно. ДАШТ-д ахлах дасгалжуулагч Ж.Энхтөр, зөвлөх дасгалжуулагч Турсунпулатов Аброр /Узбекстан/, Дасгалжуулагч Б. Эрдэнэбаяр, Ц. Даваацэрэн нарын удирдлага дор:

48 кг-д  Г.Ган-Эрдэнэ

51 кг-д  Х.Энхмандах

54 кг-д  Д.Ганболд

57 кг-д  Х.Энх-Амар

60 кг-д Т.Энхтөр

63.5 кг-д  Б.Чинзориг

67 кг-д  Б.Мишээлт

71 кг-д О.Бямба-Эрдэнэ

75 кг-д  Ж.Отгонжаргал

+92 кг-д  Х.Бекнур нар хүч үзнэ.

Энэ удаагийн ДАШТ-ий шагналын сан өндөр буюу 5.2 сая ам.доллар. Дэлхийн аварга тамирчин 200 мянга, мөнгөн медальт тамирчин 100 мянга, хүрэл медаль хүртвэл 50 мянган ам.долларын шагнал авах юм байна.