Гэмтэл согог судлалын үндэсний төвөөс “Дэлхийн эмч нарын өдөр”-ийг тохиолдуулан “Эмч танаараа бахархъя” талархлын арга хэмжээ, спорт өдөрлөг зохион байгууллаа. Талархлын арга хэмжээг нээж ГССҮТ-ийн ерөнхий захирал, АУ-ны магистр, клиникийн профессор, тэргүүлэх зэргийн эмч Э.Галбадрах үг хэллээ.

    Тэрбээр“Гэмтэл согогийн тусламж үйлчилгээний чиглэлээр авч хэрэгжүүлж буй бодлого, шинээр нэвтрүүлсэн арга технологи, эмч мэргэжилтнүүдийн мэдлэг ур чадвар, үйл ажиллагааны хөгжлөөр цаашид Азидаа тэргүүлэх хэмжээний төв болохын төлөө зорьж байгаа” тухайгаа онцолж, төвийн нийт эмч мэргэжилтнүүддээ баяр хүргэсэн юм.

    Мөн энэ өдөр “Энэ жилдээ-Эрүүл жиндээ” аяны хүрээнд өртөөчилсөн аялал бүхий спорт өдөрлөгийг зохион байгуулж, ГССҮТ-ийн эмч нар спортын олон төрлөөр хурд хүч, авхаалж самбаагаа сорин өрсөлдсөнөөс гадна орон орны бүжиг, урлагийн үзүүлбэрээр авьяас чадвараа гайхуулан шилдэг багуудаа шалгарууллаа.

Эрүүл агаарт идэвхитэй дасгал хөдөлгөөн хийж, амьдралын зөв дадал хэвшлийг төлөвшүүлэхэд уриалан нэгдсэн эмч нар маань ийнхүү нэгэн өдрийг баяр талархал, дурсамж дүүрэн өнгөрүүлсэн байна.