Дэлхийн бөхийн нэгдсэн холбооны Гүйцэтгэх зөвлөлийн хуралдаан энэ сарын 4-ний өдөр боллоо. Тус хурлаар хэд хэдэн чухал асуудал хэлэлцлээ. ОХУ, Беларусын бөхчүүдийг тодорхой шаардлага хангасан тохиолдолд олон улсын тэмцээнд оролцохыг зөвшөөрсөн. Мөн дэлхийн цомын тэмцээнийг энэ жил зохион байгуулахгүй болжээ.

         Учир нь дэлхийн цомын тэмцээнийг энэ жил зохион байгуулах орон олдоогүй байна. Дэлхийн шилдэг зургаан баг өрсөлддөг тус тэмцээнд оросын шилдэг тамирчдын бүрэлдэхүүнтэй баг оролцож чадахгүй байгаа билээ. Жинхэнэ шилдгүүдийн өрсөлдөөн явагдахгүй тул тэмцээнийг эх орондоо авах сонирхол байхгүй болжээ. Тиймээс Гүйцэтгэх зөвлөлөөс дэлхийн цомын тэмцээний талаар хоёр жилийн дараа хэлэлцэх шийдвэр гаргав. 2023 оны дэлхийн цомын тэмцээнийг АНУ-ын Коралвилл хүлээн авах ёстой байсан ч татгалзсан байна.